இந்தியாவின் முன்னணி கிரானைட் ஏற்றுமதி நிறுவனமான ‘ஜெம் கிரானைட்ஸ்’ நிறுவனர் ஆர். வீரமணி (84) மீது சுமத்தப்பட்டுள்ள போக்சோ வழக்கு தமிழகத்தில் பெரும் அதிர்வலைகளை ஏற்படுத்தியுள்ளது. கடந்த 2025-ஆம் ஆண்டு சிறுமி ஒருவருக்கு நேர்ந்த பாலியல் கொடுமை தொடர்பான வீடியோ ஆதாரம் வெளியான நிலையில், ஆரம்பத்தில் வழக்கு முடிக்கப்பட முயன்றாலும், போக்சோ சிறப்பு நீதிமன்றத்தின் அதிரடி உத்தரவைத் தொடர்ந்து தீவிர விசாரணை மேற்கொள்ளப்பட்டது. ஆய்வின் முடிவில் வீடியோவில் இருந்தது வீரமணிதான் என்பது உறுதிசெய்யப்பட்டு அவர் கைது செய்யப்பட்டு சிறையில் அடைக்கப்பட்டார். தற்போது வரை 8-க்கும் மேற்பட்ட சிறுமிகள் இவர் மீது புகார்களை அளித்துள்ள சம்பவம் இந்த விவகாரத்தின் தீவிரத்தை வெளிப்படுத்துகிறது.
இந்நிலையில், இவ்வழக்கில் தொடர்புடைய அனைவர் மீதும் எவ்வித தாட்சண்யமும் இன்றி சட்ட நடவடிக்கை எடுக்க முதலமைச்சர் விஜய் உத்தரவிட்டுள்ளார். சென்னை மாநகர காவல் ஆணையர் அமல்ராஜை நேரில் வரவழைத்து, வீரமணியின் வாக்குமூலத்தை விரிவாகக் கேட்டறிந்த முதலமைச்சர், “யாரும் தப்பிவிடக் கூடாது, குற்றம் சாட்டப்பட்ட அனைவரையும் சட்டத்தின் முன் நிறுத்துங்கள்” என்று கடுமையாக அறிவுறுத்தினார். மேலும், இந்த விவகாரத்தில் நடைபெற்ற சட்டவிரோதப் பணப் பரிவர்த்தனைகளை முழுமையாக வெளிக்கொண்டுவர தனிப்படை அமைக்கவும் உத்தரவிடப்பட்டுள்ளது. இதன் தொடர்ச்சியாக, கடந்த 24 மணி நேரத்தில் பலருக்கும் சம்மன் அனுப்பப்பட்டு விசாரணை முடுக்கிவிடப்பட்டுள்ளது.
இந்த வழக்கின் விசாரணை விரிவடைந்து வரும் சூழலில், வீரமணிக்குச் சொந்தமான சென்னையில் உள்ள ரூ.120 கோடி மதிப்பிலான சொத்து மற்றும் ஊட்டியில் உள்ள ₹10 கோடி சொத்துகளை மிரட்டி வாங்கிய விவகாரத்தில் தெற்கு ரயில்வே சங்க முக்கிய தலைவரின் மகனுக்குத் தொடர்பு இருப்பது தெரியவந்துள்ளது. அவர் வெளிநாட்டிற்குத் தப்பிச் சென்றுள்ளதால், சங்கத் தலைவரையே அழைத்து விசாரிக்கக் காவல்துறை ஆலோசித்து வருகிறது. அதேவேளையில், முந்தைய ஆட்சிக்காலத்தில் இவ்வழக்கை மூடிமறைக்க நடந்த பேரங்களில் சில பத்திரிகையாளர்களுக்கும் பங்கிருப்பதாகக் கூறப்படும் நிலையில், அவர்களுக்கும் சம்மன் அனுப்பப்படவுள்ளது. இது வெளியானால் மேலும் பல திடுக்கிடும் உண்மைகள் வெளிவரும் என எதிர்பார்க்கப்படுகிறது.
தற்போது வீரமணிக்கு எதிரான போக்சோ வழக்கில் பல்வேறு வலுவான ஆதாரங்களைச் சேகரித்துள்ள காவல்துறை, கைது நடவடிக்கைகளுக்கு முன்பாக சட்டரீதியான நடைமுறைகளை முழுமைப்படுத்தவே சம்மன்களை அனுப்பி விசாரணை நடத்தி வருகிறது. அனைத்து ஆவணங்களையும் கச்சிதமாகத் தயார் செய்துவரும் காவல்துறையின் இந்த தீவிர நடவடிக்கையால், இன்னும் சில தினங்களில் மேலும் பல முக்கியப் புள்ளிகள் அதிரடியாகக் கைது செய்யப்படலாம் எனத் தெரிகிறது. சமூகத்தில் செல்வாக்குமிக்க நபர் சம்பந்தப்பட்ட இந்த வழக்கில் முதலமைச்சரின் நேரடித் தலையீடும், காவல்துறையின் அதிரடி முடுக்கமும் பெரும் பரபரப்பை ஏற்படுத்தியுள்ளன.