கர்நாடக மாநிலம் பெங்களூரு கிராமப்புற மாவட்டத்தில், புதையல் கிடைக்கும் என்ற மூடநம்பிக்கையால் ஒரு வயது குழந்தை ஒன்று நரபலி கொடுக்கப்படவிருந்த பயங்கரம் 2026, ஜனவரி 3-ஆம் தேதி (சனிக்கிழமை) முறியடிக்கப்பட்டுள்ளது. பெங்களூரு கிராமப்புற மாவட்டத்திலுள்ள சையத் இம்ரான் என்பவரது வீட்டில், குழந்தையைப் பலியிடுவதற்கான சடங்குகள் ரகசியமாக நடந்து வந்துள்ளன.
இது குறித்துத் தகவல் கிடைத்தவுடன், மாவட்டக் குழந்தைகள் பாதுகாப்புப் பிரிவு அதிகாரிகள் விரைந்து சென்று சோதனையிட்டனர். அப்போது வீட்டின் உள்ளே குழி தோண்டப்பட்டு, பூக்கள் மற்றும் தூபப் பொருட்களுடன் சடங்குகள் நடைபெறுவதைக் கண்டறிந்து அவற்றைப் பாதியிலேயே தடுத்து நிறுத்தினர். அதிர்ஷ்டவசமாக உயிருடன் மீட்கப்பட்ட அந்தக் குழந்தை, தற்போது குழந்தைகள் பராமரிப்பு மையத்திற்கு மாற்றப்பட்டுள்ளது. இச்சம்பவம் குறித்து காவல்துறையினர் தீவிர விசாரணை மேற்கொண்டு வருகின்றனர்.