பீகார் மாநிலம் பெகுசராய் மாவட்டத்தில் உள்ள அரசு மருத்துவமனையில், சாலை விபத்தில் காயமடைந்து உடைந்த காலுடன் அனுமதிக்கப்பட்ட நோயாளி ஒருவருக்கு மருத்துவர்கள் அட்டைப்பெட்டியை வைத்து கட்டுப்போட்ட அதிர்ச்சி சம்பவம் நடந்துள்ளது. போதிய மருத்துவ உபகரணங்கள் மற்றும் எலும்பு முறிவு சிகிச்சைக்கான பிளாஸ்டர் வசதிகள் உடனடியாகக் கிடைக்காததால், நோயாளியின் காலை நிலைநிறுத்த மருத்துவர்கள் இந்த தற்காலிக வழியைக் கையாண்டதாகத் தெரிகிறது. இந்தச் சம்பவம் தொடர்பான புகைப்படங்களும் வீடியோக்களும் சமூக வலைதளங்களில் வெளியாகி கடும் விமர்சனங்களை எழுப்பியது.
இச்சம்பவம் குறித்து மருத்துவமனை நிர்வாகம் தரப்பில் விளக்கம் அளிக்கப்பட்டது. விபத்தில் சிக்கிய நோயாளி தீவிரமான எலும்பு முறிவுடன் மருத்துவமனைக்குக் கொண்டுவரப்பட்டபோது, உடனடியாக அவரது கால அசைவைத் தடுத்து மேலும் பாதிப்பு ஏற்படாமல் இருக்கவே அட்டைப்பெட்டி வைக்கப்பட்டு முதலுதவி அளிக்கப்பட்டது எனத் தெரிவிக்கப்பட்டுள்ளது. சம்பவத்தின்போது மருத்துவமனையில் எலும்பு முறிவு சிகிச்சைப் பிரிவில் தற்காலிகமாக பிளாஸ்டர் போடும் பொருட்கள் தட்டுப்பாடாக இருந்ததா அல்லது அவசர கால நடவடிக்கையாக இது செய்யப்பட்டதா என்பது குறித்து விரிவான விசாரணைக்கு உத்தரவிடப்பட்டுள்ளது.
இச்சம்பவம் பீகாரின் சுகாதாரத் துறை அமைப்பின் அவலநிலையை வெளிச்சம் போட்டுக் காட்டியுள்ளதாகப் பலரும் கண்டனம் தெரிவித்துள்ளனர். அரசு மருத்துவமனைகளில் போதிய அவசரகால மருத்துவ உபகரணங்களும், சரியான சிகிச்சை வசதிகளும் உடனடியாகக் கிடைப்பதை மாநில அரசு உறுதி செய்ய வேண்டும் எனப் பொதுமக்கள் கோரிக்கை விடுத்துள்ளனர். தற்போது சம்பந்தப்பட்ட நோயாளிக்கு உரிய எலும்பு முறிவு சிகிச்சை அளிக்கப்பட்டு தீவிர கண்காணிப்பில் வைக்கப்பட்டுள்ளார்.