வனத்துறையே வியந்த தருணம்..! காடுகளின் மர்மத்தை உடைத்த ஆண் புலி… மெய்சிலிர்க்கும் காட்சி… இணையத்தை உலுக்கும் பதிவு…!!

அசாம் மாநிலத்தின் திஹிங் பட்காய் தேசிய பூங்காவில் அரிய நிகழ்வாக ஆண் புலி ஒன்று தானியங்கி கேமராவில் பதிவாகியுள்ளது. சமீபத்தில் யானைக் கூட்டத்தால் ராஜ்தானி விரைவு ரயில் நிறுத்தப்பட்ட செய்தியைத் தொடர்ந்து, இந்த புதிய வனவிலங்கு பதிவு இணையத்தில் அனைவரின் கவனத்தையும் ஈர்த்துள்ளது. இந்திய விலங்கியல் ஆய்வகம் மற்றும் டிக்போய் வனப்பிரிவின் மார்கெரிட்டா மேற்கு வனத்துறை அதிகாரிகள் இணைந்து மேற்கொண்ட தொடர் கண்காணிப்பின் மூலம் இந்த புலியின் நடமாட்டம் படம்பிடிக்கப்பட்டுள்ளது.

இதற்கு முன்னதாகவே வனப்பகுதியில் புலியின் கால்தடங்கள் கண்டறியப்பட்டிருந்தாலும், தற்போது கிடைத்துள்ள கேமரா பதிவுகள் அதை அறிவியல் பூர்வமாக நிரூபித்துள்ளன. இத்தகவலை அசாம் மாநில சுற்றுச்சூழல் துறை அமைச்சர் ஜெயந்த மல்லாபருவா தனது ‘எக்ஸ்’ சமூக வலைத்தளப் பக்கத்தில் அதிகாரப்பூர்வமாகப் பகிர்ந்துள்ளார். இது வனத்துறை அதிகாரிகள் மற்றும் களப்பணியாளர்களின் பல மணிநேர கடின உழைப்பிற்கும், ரோந்துப் பணிகளுக்கும் கிடைத்த மிகப்பெரிய வெற்றி என்றும், திஹிங் பட்காய் காடுகளின் வளமான சூழலியலை இது உணர்த்துகிறது என்றும் அவர் பெருமிதத்துடன் குறிப்பிட்டுள்ளார்.

சுமார் 231.65 சதுர கிலோமீட்டர் பரப்பளவில் அசாமின் திப்ருகர் மற்றும் டின்சுகியா மாவட்டங்களில் அமைந்துள்ள திஹிங் பட்காய் தேசிய பூங்கா, அம்மாநிலத்தின் மிக முக்கியமான மழைக்காடாகும். இந்த அடர்ந்த வனப்பகுதி சிறந்த பல்லுயிர் வளத்திற்குப் பெயர் பெற்றது. இங்கு ஸ்லோ லோரிஸ், ஹூலாக் கிப்பன் உள்ளிட்ட 50 வகையான பாலூட்டிகள், 293 பறவையினங்கள், 310 வண்ணத்துப்பூச்சி இனங்கள் மற்றும் 47 வகையான ஊர்வன என ஏராளமான உயிரினங்கள் வாழ்ந்து வருகின்றன. அரிய வகை உயிரினங்களின் புகலிடமாக விளங்கும் இப்பூங்காவில், தற்போது புலியின் இருப்பு உறுதி செய்யப்பட்டுள்ளது அதன் வனச் செழுமைக்குச் சான்றாக அமைந்துள்ளது.