தமிழகத்தில் முதல்வர் விஜய் தலைமையிலான அமைச்சரவை இன்று காலை விரிவாக்கம் செய்யப்பட உள்ளது. ஏற்கனவே முதல்வர் உட்பட 10 அமைச்சர்கள் பொறுப்பேற்றுள்ள நிலையில், நாளை மேலும் 21 பேர் புதிய அமைச்சர்களாகப் பதவியேற்க உள்ளனர். இதற்கான அதிகாரப்பூர்வ அழைப்பிதழை ஆளுநர் மாளிகை வெளியிட்டுள்ளது. இன்று காலை ஆளுநர் மாளிகையில் நடைபெறவிருக்கும் இந்த விழாவிற்கு முன்னதாக, காலை 7.30 மணியளவில் புதிய அமைச்சர்களின் முழுமையான பட்டியல் வெளியாகும் என்று பெரிதும் எதிர்பார்க்கப்படுகிறது.
இந்த அமைச்சரவை விரிவாக்கத்தின் மிக முக்கிய அம்சமாக, சுமார் 59 ஆண்டுகளுக்குப் பிறகு தமிழக அமைச்சரவையில் காங்கிரஸ் கட்சிக்கு இடம் கிடைத்துள்ளது. காங்கிரஸ் கட்சியின் சார்பில் வழக்கறிஞர் ராஜேஷ் குமார் மற்றும் விஸ்வநாதன் ஆகிய இரு எம்.எல்.ஏ-க்கள் அமைச்சர்களாகப் பொறுப்பேற்க உள்ளனர். இதற்கான அதிகாரப்பூர்வ அறிவிப்பு ஏற்கனவே வெளியிடப்பட்டுவிட்டதால், அரசியல் வட்டாரத்தில் இது பெரும் திருப்புமுனையாகப் பார்க்கப்படுகிறது.
அதே வேளையில், தமிழக வெற்றிக் கழகத்தின் (தவெக) சார்பில் அமைச்சராகப் போவது யார் யார் என்ற எதிர்பார்ப்பு தொண்டர்களிடையே எகிறியுள்ளது. அதிகாரப்பூர்வ அறிவிப்பு இன்னும் வெளியாகாத நிலையிலும், முதல்வர் விஜய்யின் நண்பரும், தூத்துக்குடி தொகுதியில் அமைச்சர் கீதா ஜீவனை தோற்கடித்தவருமான ஸ்ரீநாத் அமைச்சரவையில் இடம்பெறுவது உறுதியாகிவிட்டதாகக் கூறப்படுகிறது. அவருடன் தவெக எம்.எல்.ஏ-க்களான ஆர்கே நகர் மரிய வில்சன், சேலம் பார்த்திபன், பர்வேஸ், ரஞ்சித் குமார் மற்றும் ராஜ் குமார் ஆகியோரும் புதிய அமைச்சர்களாகப் பொறுப்பேற்க வாய்ப்புள்ளதாகத் தகவல்கள் தெரிவிக்கின்றன.
தமிழக சட்டப்பேரவை விதிகளின்படி முதல்வர் உட்பட அதிகபட்சமாக 36 பேர் வரை அமைச்சரவையில் இடம்பெறலாம் என்ற நிலையில், இன்று 21 பேர் இணைவதன் மூலம் மொத்த அமைச்சர்களின் எண்ணிக்கை 31 ஆக உயரும். தற்போது சென்னையில் இருந்து ஏற்கனவே முதல்வர் விஜய், ஆதவ் அர்ஜுனா, புஸ்ஸி ஆனந்த், ராஜ்மோகன், வெங்கட்ரமணன் ஆகியோர் அமைச்சர்களாக உள்ள நிலையில், நாளை மரிய வில்சனும் இணைந்தால் சென்னையில் இருந்து மட்டுமே 6 அமைச்சர்கள் என்ற நிலை உருவாகும். இந்த மண்டல ரீதியிலான பிரதிநிதித்துவம் தவெகவினர் மத்தியில் தற்போது பெரும் விவாதப் பொருளாக மாறியுள்ளது.