கடந்த நவம்பர் 2025 இல், அமெரிக்காவின் கென்டக்கி மாநிலத்தில் உள்ள லுயிஸ்வில் சர்வதேச விமான நிலையத்திலிருந்து ஹொனொலுலு நோக்கிப் புறப்பட்ட யுபிஎஸ் ஏர்லைன்ஸ் நிறுவனத்தின் ‘ஃபிளைட் 2976’ (UPS Flight 2976) என்ற சரக்கு விமானம் ஓடுதளத்தில் வேகமாகச் சென்று டேக்-ஆஃப் (Take-off) ஆன சில வினாடிகளிலேயே விபத்துக்குள்ளானது. தற்போது NTSB வெளியிட்டுள்ள விமான நிலைய சிசிடிவி காட்சிகளில், விமானம் காற்றில் எழும்பிய உடனே அதன் இடது பக்க எஞ்சின் மற்றும் இறக்கையோடு இணைக்கும் பகுதி (Pylon) திடீரென தீப்பொறியுடன் தனியாகக் கழன்று கீழே விழுவது தெளிவாகப் பதிவாகியுள்ளது. எஞ்சினை இழந்ததால் கட்டுப்பாட்டை இழந்த அந்த விமானம், சில அடி உயரமே பறந்த நிலையில் அருகில் இருந்த தொழில்பேட்டைப் பகுதியில் உள்ள கட்டிடங்கள் மீது மோதி பெரும் தீப்பந்தாக வெடித்துச் சிதறியது.
மெக்டொனால்ட் டக்ளஸ் எம்டி-11எஃப் (McDonnell Douglas MD-11F) ரகத்தைச் சேர்ந்த இந்த 34 ஆண்டுகள் பழமையான விமான விபத்தில், அதில் பயணித்த கேப்டன் ரிச்சர்ட் வார்டன்பெர்க் உட்பட 3 விமான ஊழியர்களும் சம்பவ இடத்திலேயே உயிரிழந்தனர். மேலும், விமானம் குடியிருப்பு மற்றும் தொழில் நிறுவனங்கள் நிறைந்த பகுதியில் விழுந்து நொறுங்கியதால், தரையில் இருந்த 12 பொதுமக்களும் பலியாகினர் (பின்னர் சிகிச்சை பலனின்றி மற்றொருவர் உயிரிழந்ததால் மொத்த பலி எண்ணிக்கை 15 ஆக உயர்ந்தது). இந்த பயங்கர விபத்தில் மேலும் 20-க்கும் மேற்பட்டோர் காயமடைந்தனர், அத்தோடு விமான எரிபொருள் பரவியதால் அப்பகுதியில் உள்ள வாகன மறுசுழற்சி ஆலை உள்ளிட்ட பல கட்டிடங்கள் தீக்கிரையாகின.
இந்த விபத்து தொடர்பாக வாஷிங்டனில் நடைபெற்ற முதற்கட்ட விசாரணையில் பல முக்கிய தகவல்கள் வெளியாகியுள்ளன. விபத்துக்குள்ளான இந்த குறிப்பிட்ட விமானம் முதலில் அந்தப் பயணத்திற்காகத் திட்டமிடப்படவில்லை என்றும், வழக்கமாகப் பறக்க வேண்டிய மற்றொரு விமானத்தில் எரிபொருள் கசிவு கண்டறியப்பட்டதால், அதற்குப் மாற்றாகவே இந்த விமானம் அவசர அவசரமாகப் பயன்படுத்தப்பட்டது என்றும் விசாரணையில் தெரியவந்துள்ளது. மேலும், விமானத்தின் எஞ்சினை இறக்கையுடன் இணைக்கும் உலோகப் பகுதியில் ஏற்பட்ட ‘மெட்டல் ஃபாட்டிக்’ (உலோக அலுப்பு காரணமாக ஏற்படும் விரிசல்) காரணமாகவே எஞ்சின் தனியாகக் கழன்று விழுந்துள்ளது என்றும், இது போன்ற குறைபாடுகள் குறித்து 2011 ஆம் ஆண்டிலேயே போயிங் நிறுவனம் எச்சரித்திருந்தும் போதிய பராமரிப்பு நடவடிக்கைகள் எடுக்கப்படவில்லை என்றும் NTSB விசாரணையில் சுட்டிக்காட்டப்பட்டுள்ளது.