டெல்லி பதவியைக் காட்டி தூண்டில் போடும் தவெக…? ஓகே சொன்ன சி.வி சண்முகம்.. தமிழ்நாட்டில் 5 தொகுதிக்கு இடைத்தேர்தல்..? பின்னணியில் இருக்கும் டெல்லி டீல்..!!

நடந்து முடிந்த சட்டசபை தேர்தலில் அதிமுக 47 தொகுதிகளில் மட்டுமே வெற்றி பெற்றதைத் தொடர்ந்து, தோல்வி குறித்து ஆராயவில்லை எனக்கூறி எஸ்பி வேலுமணி மற்றும் சி.வி.சண்முகம் தலைமையில் 25 எம்எல்ஏக்கள் தனியாகப் பிரிந்தனர். இதனால் எடப்பாடி பழனிசாமி தலைமையில் 22 எம்எல்ஏக்கள் மட்டுமே இருந்தனர். இதற்கிடையே, தமிழகத்தில் தவெக அரசு பெரும்பான்மையை நிரூபிக்க வேலுமணி அணியினர் ஆதரவு தெரிவித்தனர். எடப்பாடி தரப்பின் கொறடா உத்தரவை மீறி ஆதரவளித்ததால், தவெக அமைச்சரவை விரிவாக்கத்தின் போது வேலுமணி தரப்புக்கு இடம் தரப்படும் என எதிர்பார்க்கப்பட்டது. ஆனால், தவெகவுக்கு ஆதரவளிக்கும் திமுக கூட்டணிக் கட்சிகளின் ஆட்சேபனையால் அவர்களுக்கு அமைச்சர் பதவி வழங்கப்படவில்லை எனச் சொல்லப்படுகிறது.

அமைச்சர் பதவி கிடைக்காததைத் தொடர்ந்து, வேலுமணி அணியில் இருந்த மரகதம் குமரவேல், சத்தியபாமா, ஜெயக்குமார், இசக்கி சுப்பையா ஆகிய 4 எம்எல்ஏக்கள் தங்களின் பதவியை ராஜினாமா செய்துவிட்டு தவெகவில் இணைந்தனர்; இவர்களுக்கு வாரியத் தலைவர் பதவி வழங்கப்படலாம் எனக் கூறப்படுகிறது. இதற்கிடையே, எஸ்பி வேலுமணி உள்ளிட்ட சில எம்எல்ஏக்கள் மீண்டும் எடப்பாடி பழனிசாமி தரப்பிற்கே திரும்பிவிட்டனர். ஆனால், முன்னாள் அமைச்சர்களான சி.வி.சண்முகம் மற்றும் சி. விஜயபாஸ்கர் ஆகிய இருவரும் எடப்பாடி பழனிசாமியிடம் செல்லவில்லை.

தற்போது சி.வி.சண்முகம் மற்றும் சி. விஜயபாஸ்கர் ஆகிய இருவரும் எம்எல்ஏ பதவியை ராஜினாமா செய்துவிட்டு தவெகவில் இணைவார்கள் எனப் பேசப்படும் நிலையில், விஜயபாஸ்கரோ தான் எம்ஜிஆர், ஜெயலலிதா வழியில்தான் நடப்பேன் என்று தெரிவித்துள்ளார். அதேநேரம், சி.வி.சண்முகம் தனது எம்எல்ஏ பதவியை ராஜினாமா செய்தால், அவருக்குத் தமிழக அரசின் டெல்லி சிறப்புப் பிரதிநிதி பதவி வழங்கப்படும் என தவெகவின் முக்கிய நிர்வாகிகள் பேச்சுவார்த்தை நடத்தி வருகின்றனர். அவர் விரைவில் ராஜினாமா செய்யக்கூடும் என்றும், அப்படி நடக்கும் பட்சத்தில் தமிழகத்தில் 5 தொகுதிகளுக்கு இடைத்தேர்தல் வர வாய்ப்புள்ளது என்றும் சொல்லப்படுகிறது.