மழை பெய்ஞ்சா கண்ணீர் வடியும் குகை.. பல்கேரியாவில் இருக்கும் ‘கடவுளின் கண்கள்’.. இயற்கையின் உச்சக்கட்ட மாயாஜாலம்.. பின்னணியில் இருக்கும் மர்மம்..!!

ஐரோப்பிய நாடான பல்கேரியாவின் தலைநகர் சோஃபியாவில் இருந்து சுமார் இரண்டு மணி நேரத் தொலைவில் அமைந்துள்ள ‘ப்ரோஹோத்னா குகை’ (Prohodna Cave) உலக அளவில் பெரும் வியப்பை ஏற்படுத்தி வருகிறது. இந்த குகையின் கூரையில் இயற்கையாகவே மனித கண்கள் போன்ற வடிவில் இரண்டு பிரம்மாண்ட துளைகள் அமைந்துள்ளன. இதன் விசித்திரமான தோற்றத்தின் காரணமாகவே, உலக மக்கள் இதனை ‘கடவுளின் கண்கள்’ (Eyes of God) என்று அன்போடு அழைக்கிறார்கள். பகல் நேரத்தில் சூரிய ஒளி இந்த துளைகள் வழியாக குகைக்குள் ஊடுருவி வரும்போது, நீல வானமே குகைக்குள் எட்டிப் பார்ப்பது போன்ற ஒரு மாயாஜாலக் காட்சி அரங்கேறுகிறது.

ஆயிரக்கணக்கான ஆண்டுகளுக்கு முன்பு ஏற்பட்ட இயற்கை அரிப்பு மற்றும் சுண்ணாம்புப் பாறைகளின் ரசாயன மாற்றங்களால் இந்த குகை உருவாகியுள்ளது. சாதாரண நாட்களை விட மழைக்காலங்களில் இக்குகை மேலும் மர்மமாகவும், பிரமிப்பாகவும் மாறுகிறது. பலத்த மழை பெய்யும் போது, இந்த கண் போன்ற துளைகளில் இருந்து தண்ணீர் கீழே கொட்டுவது, பார்ப்பதற்கு ஏதோ கடவுளே நேரில் நின்று அழுது கண்ணீர் வடிப்பது போன்ற ஒரு விவரிக்க முடியாத தோற்றத்தை ஏற்படுத்துகிறது.

எந்தவித நுழைவுக் கட்டணமும் இல்லாத, வரலாற்றுச் சிறப்புமிக்க இந்த 880 அடி நீள குகை வெறும் இயற்கை அதிசயத்தோடு நின்றுவிடாமல் சாகச விரும்பிகளின் சொர்க்கமாகவும் திகழ்கிறது. இந்த குகைக்குள் பங்கீ ஜம்பிங் (Bungee Jumping) மற்றும் ராக் கிளைம்பிங் (Rock Climbing) போன்ற அதிரடி சாகச விளையாட்டுகளும் அனுமதிக்கப்படுவதால், உலகெங்கிலும் இருந்து லட்சக்கணக்கான சுற்றுலாப் பயணிகள் இந்த அதிசயத்தைக் காண இங்குக் குவிந்த வண்ணம் உள்ளனர்.