“அதிமுகவில் வெடித்த ஜாதி அரசியல் சண்டை”… வேலுமணிக்கு கல்தா கொடுக்க ஸ்கெட்ச் போட்ட கே.பி.முனுசாமி… அடுத்த பரபரப்பு…!

அதிமுகவில் தேர்தல் தோல்விக்குப் பிறகு ஏற்பட்டுள்ள உட்கட்சிப் பூசல்களும், முன்னாள் அமைச்சர் எஸ்.பி. வேலுமணி மற்றும் கே.பி. முனுசாமி ஆகியோருக்கு இடையேயான அதிகாரப் போட்டியும் தற்போதைய அரசியல் வட்டாரத்தில் பெரும் பரபரப்பை ஏற்படுத்தியுள்ளது. அண்மையில் நடந்த சட்டமன்றத் தேர்தலில் அதிமுக மூன்றாவது இடத்திற்குத் தள்ளப்பட்டதைத் தொடர்ந்து, அக்கட்சியில் பெரிய அளவில் அதிருப்தி அலை உருவானது. எடப்பாடி பழனிசாமிக்கு எதிராக எஸ்.பி. வேலுமணி, சி.வி. சண்முகம், விஜயபாஸ்கர் உள்ளிட்ட முன்னாள் அமைச்சர்கள் அணி திரண்டதோடு, தமிழக வெற்றிக் கழகத்திற்கு (தவெக) ஆதரவளித்ததாகவும் கூறப்பட்டது. இதன் காரணமாக ஆத்திரமடைந்த எடப்பாடி பழனிசாமி, அவர்களின் முக்கியக் கட்சிப் பதவிகளைப் பறித்து அதிரடி நடவடிக்கை எடுத்தார்.

இதனைத் தொடர்ந்து, எஸ்.பி. வேலுமணி மீண்டும் எடப்பாடி பழனிசாமியிடம் சரணடைந்து சமாதானம் பேசினாலும், அவரிடமிருந்து பறிக்கப்பட்ட தலைமை நிலையச் செயலாளர் பதவி அவருக்கு மீண்டும் வழங்கப்படவில்லை. இந்த விவகாரத்தில் வேலுமணி தனது பழைய செல்வாக்கான பதவியைப் பெறுவதற்கு அதிமுக துணைப் பொதுச்செயலாளர் கே.பி. முனுசாமி முட்டுக்கட்டையாக இருப்பதாகக் கூறப்படுகிறது. எடப்பாடி பழனிசாமி பொதுச்செயலாளராகப் பொறுப்பேற்ற பிறகு, ஜாதி அடிப்படையிலேயே முக்கியப் பதவிகள் பிரிக்கப்பட்டதாக அதிமுக நிர்வாகிகள் தெரிவிக்கின்றனர். கவுண்டர், வன்னியர், முக்குலத்தோர் என சமுதாய ரீதியாகப் பதவிகள் பகிர்ந்தளிக்கப்பட்ட நிலையில், தற்போதைய தோல்வி அந்தப் பதவி விநியோக முறையையே கேள்விக்குள்ளாக்கியுள்ளது.

தற்போது வேலுமணியிடம் இருந்த தலைமை நிலைய செயலாளர் பதவிக்கும், நத்தம் விஸ்வநாதனிடம் இருந்த துணைப் பொதுச்செயலாளர் பதவிக்கும் அதிமுகவிற்குள் கடும் போட்டி நிலவி வருகிறது. மதுரையைச் சேர்ந்த முன்னாள் அமைச்சர்கள் நத்தம் விஸ்வநாதனின் பதவியைக் கைப்பற்ற காய் நகர்த்தி வர, கொங்கு மண்டலத்தைச் சேர்ந்த கவுண்டர் சமூக நிர்வாகிகள் வேலுமணியின் பதவியைப் பெற தீவிர முயற்சி செய்து வருகின்றனர். இதற்கிடையே, மாவட்டச் செயலாளர் பதவியும் பறிக்கப்பட்ட நிலையில், கோவை திரும்பிய வேலுமணியை அவரது ஆதரவாளர்கள் பழைய பதவியைக் குறிப்பிட்டு வரவேற்றனர். ஆனால், பதவி பறிக்கப்பட்ட நிர்வாகிகள் பழைய கட்சிப் பதவிகளைப் பயன்படுத்தக் கூடாது என்று எடப்பாடி பழனிசாமி கடுமையான உத்தரவைப் பிறப்பித்துள்ளார்.

இந்தச் சூழலில், கே.பி. முனுசாமி எடப்பாடி பழனிசாமிக்கு வழங்கிய ஆலோசனைகள் வேலுமணியை மேலும் அதிருப்தி அடையச் செய்துள்ளது. ஏற்கனவே ஜாதி அடிப்படையில் முக்கியப் பதவிகளைப் பகிர்ந்து தேர்தலைச் சந்தித்தும் கட்சி மூன்றாவது இடத்திற்குத் தள்ளப்பட்டுவிட்டதால், இனி நீக்கப்பட்ட பதவிகளை அதே சமுதாயத்தைச் சேர்ந்தவர்களுக்கு வழங்க வேண்டியதில்லை என்று முனுசாமி வாதிட்டுள்ளார். அதற்குப் பதிலாகப் புதியவர்களுக்கு வாய்ப்பளித்தால் அவர்கள் உற்சாகத்துடன் பணியாற்றுவார்கள் என்றும், அது கட்சிக்கு பலன் தரும் என்றும் அவர் கூறியுள்ளார். முனுசாமியின் இந்த ஆலோசனையை எடப்பாடி பழனிசாமி தீவிரமாக யோசிக்கத் தொடங்கியுள்ளதால், தனது அரசியல் எதிர்காலம் மற்றும் செல்வாக்கு குறித்து வேலுமணி கடுமையான அதிருப்தியிலும் கடுப்பிலும் இருப்பதாக அதிமுக வட்டாரங்கள் தெரிவிக்கின்றன.