செல்போனில் ஆபாசப்படம்… 2 வயது குழந்தையை பாலியல் வன்கொடுமை செய்த சிறுவன்… இறுதியில் வெளிச்சத்திற்கு வந்த பகீர் சம்பவம்…!

மஹாராஷ்டிர மாநிலம் பீட் மாவட்டத்தில் அரங்கேறியுள்ள இந்த கொடூர சம்பவம், மனிதநேயத்தையே உலுக்கும் வகையில் அமைந்துள்ளது. அம்பாஜோகாய் கிராமப்புற காவல் எல்லைக்குட்பட்ட பகுதியில், இரண்டு வயது சிறுமி ஒருவரை அவரது 15 வயது உறவினரே பாலியல் வன்கொடுமை செய்துள்ள அதிர்ச்சி தகவல் தற்போது வெளிச்சத்திற்கு வந்துள்ளது. கடந்த மார்ச் 17-ம் தேதி, வீட்டின் முன் இருந்த தண்ணீர் தொட்டியில் விழுந்து அந்த சிறுமி உயிரிழந்த நிலையில், ஆரம்பத்தில் இது ஒரு விபத்தாகவே கருதப்பட்டது. ஆனால், பிரேத பரிசோதனை அறிக்கையில் அந்த சிறுமி பாலியல் ரீதியாக துன்புறுத்தப்பட்டது உறுதி செய்யப்பட்டதால், இந்த விபத்து மரணம் ஒரு பெரும் குற்றச் செயலாக உருவெடுத்தது.

இந்த வழக்கின் தீவிரத்தை உணர்ந்த காவல் கண்காணிப்பாளர் நவ்நீத் கன்வத் மற்றும் காவல் ஆய்வாளர் முரளிதர் கோக்லே தலைமையிலான குழுவினர் தீவிர விசாரணையில் இறங்கினர். சிறுமியின் மரணத்திற்குப் பிறகு, அவரது 15 வயது அத்தை மகன் கடந்த மூன்று நாட்களாக உணவு உட்கொள்ளாமல், தொடர்ந்து அழுது கொண்டே இருந்ததை போலீசார் கவனித்தனர். அவனது வழக்கத்திற்கு மாறான நடத்தை போலீசாருக்கு சந்தேகத்தை ஏற்படுத்திய நிலையில், அவனிடம் நடத்திய ரகசிய விசாரணையில் திடுக்கிடும் உண்மைகள் வெளிவந்தன. கைப்பேசியில் ஆபாச வீடியோக்களைப் பார்த்த தாக்கத்தினால் தான் இந்த கொடூரத்தைச் செய்ததாக அந்தச் சிறுவன் ஒப்புக்கொண்டான்.

விசாரணையில் தெரியவந்த தகவலின்படி, சிறுமி உயிரிழப்பதற்கு எட்டு நாட்களுக்கு முன்பே, வீட்டில் யாரும் இல்லாத நேரத்தில் அந்தச் சிறுவன் குழந்தைக்கு சாக்லேட் கொடுத்து பாலியல் வன்புணர்வு செய்துள்ளான். இது ஒருமுறை மட்டும் நடக்கவில்லை என்பதும், அந்தப் பிஞ்சு குழந்தையை அவன் தொடர்ச்சியாகத் துன்புறுத்தி வந்ததும் அம்பலமானது. கைப்பேசியில் ஆபாசக் காட்சிகளைப் பார்க்கும் பழக்கம் ஒரு சிறுவனை எந்த அளவிற்கு வக்கிரம் நிறைந்த குற்றவாளியாக மாற்றியுள்ளது என்பதை இந்தச் சம்பவம் வெளிச்சமிட்டுக் காட்டுகிறது. ஒரு பாதுகாப்பான குடும்பச் சூழலிலேயே இத்தகைய கொடூரம் நிகழ்ந்திருப்பது மக்களிடையே பெரும் அச்சத்தையும் வேதனையையும் ஏற்படுத்தியுள்ளது.

தற்போது, குற்றம் சாட்டப்பட்ட சிறுவன் மீது இந்திய தண்டனைச் சட்டம் (2023) பிரிவு 64(1) மற்றும் போக்சோ (POCSO) சட்டம் 2012-ன் பல்வேறு பிரிவுகளின் கீழ் வழக்குப்பதிவு செய்யப்பட்டுள்ளது. இச்சம்பவத்தில் காவல் ஆய்வாளர் முரளிதர் கோக்லேவே அரசு சார்பில் புகார்தாரராக மாறி வழக்கை முன்னெடுத்துள்ளார். தொழில்நுட்பக் கருவிகள் மற்றும் ஆபாச ஊடகங்கள் இளைய தலைமுறையினரின் மனநிலையை எவ்வாறு சீரழிக்கின்றன என்பதற்கு இந்தத் துயரச் சம்பவம் ஒரு எச்சரிக்கையாக அமைந்துள்ளது.