சீமானிடமே சோதனையா?… “காசு இருந்தா கொடுங்க.. டெபாசிட் கட்ட உதவும்!”… பறக்கும் படையினரை வச்சு செய்த சீமான்….!!

திராவிடக் கட்சிகளான திமுக மற்றும் அதிமுகவிற்கு மாற்றாக ‘நாம் தமிழர்’ கட்சியைத் தொடங்கி, தனித்துப் போட்டியிட்டு வருபவர் சீமான். கடந்த நாடாளுமன்றத் தேர்தலில் 8 சதவீத வாக்குகளைப் பெற்ற நிலையில், வரும் 2026 சட்டமன்றத் தேர்தலிலும் தனித்துக் களமிறங்கும் அவர், முதன்முறையாக காரைக்கால் தொகுதியில் போட்டியிடுகிறார். இதற்காகத் தீவிரப் பிரச்சாரத்தில் ஈடுபட்டு வரும் நிலையில், நேற்று இரவு காரைக்குடியில் அவரது வாகனத்தைச் சோதனைக்காகத் தேர்தல் பறக்கும் படையினர் மறித்தனர்.

அதிகாரிகளின் சோதனைக்கு ஒத்துழைப்பு அளித்த சீமான், அதே வேளையில் சரமாரியான கேள்விகளையும் எழுப்பினார். “என் வாகனத்தைச் சோதனை செய்வதில் எனக்கு எந்தப் பிரச்சனையும் இல்லை; ஆனால் திமுகவும் அதிமுகவும் ஓட்டுக்குக் காசு கொடுப்பதைத் தடுக்க உங்களால் முடியுமா? காரைக்குடி தொகுதிக்கு மட்டும் 30 கோடி ரூபாய் ஒதுக்கப்பட்டிருப்பதாகக் கேள்விப்படுகிறேன், அதில் ஒருவரையாவது உங்களால் பிடித்து வழக்குப் போட முடியுமா?” என ஆவேசமாக வினவினார். மேலும், முதல்வர் ஸ்டாலின் மற்றும் எடப்பாடி பழனிச்சாமி ஆகியோரின் வாகனங்களையும் இதேபோல் நிறுத்திச் சோதனை செய்ய வேண்டும் என அதிகாரிகளுக்குச் சவால் விடுத்தார்.

சோதனையின் போது காரின் டிக்கியில் இருந்த ஒரு பையை அதிகாரிகள் திறந்தபோது, “அதில் இருப்பது வெறும் மண்ணுதான்” என்று அங்கிருந்த தம்பி விஜய் கூற, அங்கிருந்தவர்கள் மத்தியில் சிரிப்பலை எழுந்தது. இறுதியில் அதிகாரிகளிடம் நகைச்சுவையாகப் பேசிய சீமான், “ஏதாவது பணத்தைப் பிடித்தால் எங்களிடம் கொடுங்கள்; நாளைக்குத் தேர்தலில் டெபாசிட் கட்ட உதவும்” என நக்கலாகக் கூறிவிட்டு அங்கிருந்து கிளம்பிச் சென்றார். தேர்தல் களம் சூடுபிடித்துள்ள நிலையில், சீமானின் இந்த அதிரடிப் பேச்சு தற்போது சமூக வலைதளங்களில் வைரலாகி வருகிறது.