“விஜய்ய ஆள விடுங்க..6 மாசம் டைம்”… விஜய்யை முதலமைச்சராக்க பாஜக போடும் மாஸ்டர் பிளான்… அமித்ஷாவிற்கு அனுப்பப்படும் அந்த ரகசிய கடிதம்…!

தமிழக அரசியல் களத்தில் 2026 சட்டமன்றத் தேர்தல் முடிவுகள் ஒரு புதிய திருப்பத்தை ஏற்படுத்தியுள்ள நிலையில், தமிழக வெற்றி கழகத்தின் (தவெக) தலைவர் விஜய் ஆட்சி அமைக்க அனைத்துக் கட்சிகளும் நிபந்தனையற்ற ஆதரவு அளிக்க வேண்டும் என்று பாஜக மாநில செய்தி தொடர்பாளர் ஏ.என்.எஸ். பிரசாத் கோரிக்கை விடுத்துள்ளார். எந்தவித அரசியல் பின்னணியும் இன்றி மக்கள் சேவையில் இறங்கி வெற்றி பெற்றுள்ள விஜய்க்கு, ஒரு சிறந்த நிர்வாகியாகச் செயல்பட குறைந்தபட்சம் ஆறு மாத கால அவகாசத்தை அனைத்து அரசியல் கட்சிகளும் வழங்க வேண்டும் என்று அவர் தனது அறிக்கையில் வலியுறுத்தியுள்ளார்.

தமிழக மக்கள் தவெக-விற்கு 108 இடங்களை வழங்கி தனிப்பெரும் கட்சியாக வெற்றி பெற வைத்துள்ளதைச் சுட்டிக்காட்டிய அவர், ஜனநாயக மாண்பைக் காக்க குதிரை பேர அரசியலுக்கு முற்றுப்புள்ளி வைக்க வேண்டும் என்றார். தமிழக தேசிய ஜனநாயகக் கூட்டணியின் தலைவர் எடப்பாடி பழனிசாமியிடம் இதுகுறித்து தேசியத் தலைவர்கள் பேச வேண்டும் என்றும், தவெக சுய விருப்பத்துடன் ஆட்சி அமைக்கத் தேவையான சூழலை உருவாக்க வேண்டும் என்றும் அவர் குறிப்பிட்டுள்ளார். இது தொடர்பாக பிரதமர் மோடி மற்றும் அமித் ஷா ஆகியோருக்குக் கடிதம் எழுத உள்ளதாகவும் அவர் தெரிவித்துள்ளார்.

திமுகவின் கடந்த ஐந்தாண்டு கால “திராவிட மாடல்” ஆட்சியை மக்கள் நிராகரித்துள்ளதாகக் குறிப்பிட்ட பிரசாத், கனிம வளக் கொள்ளை மற்றும் ஊழல்களைத் தடுத்து நிறுத்தினால் விஜய் அளித்த தேர்தல் வாக்குறுதிகள் சாத்தியமானவையே என்று நம்பிக்கை தெரிவித்துள்ளார். குறிப்பாக, தேசிய ஜனநாயகக் கூட்டணி முன்னெடுத்த போராட்டங்கள் திமுக ஆட்சிக்கு எதிரான மனநிலையை மக்களிடம் உருவாக்கியதாகவும், அந்த வாய்ப்பைத் தமிழக மக்கள் தற்போது விஜய்க்கு வழங்கியுள்ளதாகவும் அவர் பகுப்பாய்வு செய்துள்ளார்.

பிரிவினைவாத சக்திகள் மற்றும் சுயநலக் கட்சிகளின் அழுத்தங்களுக்கு இடம் கொடுக்காமல், தமிழகத்தின் வளர்ச்சியை முன்னிறுத்தி விஜய் செயல்பட இதுவே சரியான தருணம் என்று அவர் கூறியுள்ளார். ஆறு மாத காலத்திற்குப் பிறகு தவெக அரசின் செயல்பாடுகளைப் பொறுத்து, மற்ற கட்சிகள் தங்கள் கொள்கைகளுக்கு ஏற்ப முடிவெடுக்கலாம் என்றும், அதுவரை தமிழகத்தில் ஒரு நாகரிகமான அரசியலை முன்னெடுத்துச் செல்ல வேண்டும் என்றும் ஏ.என்.எஸ். பிரசாத் தனது அறிக்கையின் வாயிலாகக் கேட்டுக்கொண்டுள்ளார்.