“ஆதரவு தர முடியாது”… ஓ.எஸ். மணியன் கொடுத்த ‘ஷாக்’ ட்ரீட்… கடைசி நேரத்தில் விஜயை கைவிட்ட எடப்பாடி… தமிழக அரசியலில் உச்சகட்ட பரபரப்பு…!

தமிழக சட்டமன்றத் தேர்தல் முடிவுகள் வெளியாகி, அரசியல் களம் அனல் பறந்து கொண்டிருக்கும் வேளையில், அதிமுகவின் மூத்த தலைவர் ஓ.எஸ். மணியன் தெரிவித்துள்ள கருத்து பெரும் விவாதத்தை ஏற்படுத்தியுள்ளது. நடந்து முடிந்த தேர்தலில் 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள விஜய் தலைமையிலான தமிழக வெற்றிக் கழகம் (தவெக), ஆட்சியமைக்கத் தேவையான 118 என்ற மேஜிக் எண்ணைத் தொட இன்னும் 10 இடங்கள் தேவைப்படுகின்றன. இந்த இக்கட்டான சூழலில், 47 இடங்களை வைத்துள்ள அதிமுக, தவெகவுக்கு ஆதரவு அளிக்குமா என்ற எதிர்பார்ப்பு நிலவியது.

முன்னதாக, தவெக நிர்வாகிகள் அதிமுகவிடம் ஆதரவு கேட்டுப் பேச்சுவார்த்தை நடத்தி வருவதாக அதிமுக வேட்பாளர் லீமா ரோஸ் கூறியிருந்தது அரசியல் வட்டாரத்தில் பெரும் பரபரப்பைக் கிளப்பியது. ஒருவேளை அதிமுக ஆதரவு அளித்தால், தமிழகத்தில் ஒரு பலமான கூட்டணி ஆட்சி அமைய வாய்ப்புள்ளதாகக் கருதப்பட்டது. ஆனால், லீமா ரோஸின் கருத்துக்கு நேர்மாறாக, அதிமுகவின் மூத்த தலைவர்கள் இந்த விவகாரத்தில் மாற்று நிலைப்பாட்டைக் கொண்டுள்ளனர் என்பது தற்போது வெளிச்சத்திற்கு வந்துள்ளது.

சென்னை கிரீன்வேஸ் சாலையில் உள்ள அதிமுக பொதுச்செயலாளர் எடப்பாடி பழனிசாமியின் இல்லத்தில் இன்று முக்கிய ஆலோசனைக் கூட்டம் நடைபெற்றது. இந்தச் சந்திப்பிற்குப் பிறகு செய்தியாளர்களைச் சந்தித்த முன்னாள் அமைச்சர் ஓ.எஸ். மணியன், தவெக ஆட்சியமைக்க அதிமுக ஆதரவு அளிக்குமா என்ற கேள்விக்குத் திட்டவட்டமாக “இல்லை” என்று பதிலளித்தார். இதன் மூலம், விஜய்யின் தமிழக வெற்றிக் கழகத்திற்கு ஆதரவு அளிக்கும் எண்ணம் அதிமுகவுக்கு தற்போதைக்கு இல்லை என்பது அதிகாரப்பூர்வமாகத் தெரியவந்துள்ளது.

ஆட்சியமைக்க இன்னும் 10 இடங்களே தேவைப்படும் நிலையில், சிறிய கட்சிகள் அல்லது சுயேச்சைகளின் ஆதரவை விஜய் நாடக்கூடும். இருப்பினும், மிகக்குறைந்த பெரும்பான்மையுடன் ஆட்சியமைப்பது எதிர்காலத்தில் ஆட்சி கவிழும் அபாயத்தை ஏற்படுத்தும் என்பதால், தவெக அதிமுகவின் ஆதரவை பெரிதும் எதிர்பார்த்திருந்தது. ஆனால், ஓ.எஸ். மணியனின் இந்த அதிரடி மறுப்பு, தமிழக அரசியலில் மீண்டும் ஒரு இழுபறி நிலையை உருவாக்கியுள்ளது. அடுத்தகட்டமாக விஜய் என்ன செய்யப்போகிறார் என்பதே இப்போதைய மில்லியன் டாலர் கேள்வியாக உள்ளது.