தமிழ் சினிமாவில் ஒரு மாற்றத்தை ஏற்படுத்திய TR & பாக்யராஜ்.. ஆனா அது நல்லதா கெட்டதான்னுதான் தெரியல!

தமிழ் சினிமாவில் நடிகர், இயக்குனர், தயாரிப்பாளர் என பன்முக திறமைகளை கொண்டவர் பாக்கியராஜ். தொடர்ந்து 7 வெள்ளி விழா படங்களைக் கொடுத்த ஒரே தமிழ் இயக்குனர் என்ற பெருமையை பெற்ற பாக்யராஜ், இந்திய அளவிலேயே திரைக்கதை மன்னன் என்ற பெயரைப் பெற்றவர்.

பல படங்களை இயக்கி அப்போது பீக்கில் இருந்த பாக்யராஜ் 1982 ஆம் ஆண்டு நடிப்பு மற்றும் இயக்கத்தில் நான்கு படங்கள் ரிலீஸாகி நான்குமே சூப்பர்ஹிட் ஆனது. அதன் மூலம் அவர் ஒரு முன்னணி கதாநாயக நடிகனானார். அவரே கதாநாயகனாக இருந்ததால் தனக்கான கதைகளை மட்டுமே எழுதவேண்டிய சூழல் வந்ததால் அவரால் இயக்குனராக ஒரு குறிப்பிட்ட காலத்துக்குப் பின்னர் ஜொலிக்க முடியவில்லை.

இவரைப் போன்றே தமிழ் சினிமாவில் பல்துறை வித்தகராக ஜொலித்தவர் டி ராஜேந்தர். இவரும் கதை, திரைக்கதை, வசனம், இயக்கம், ஒளிப்பதிவு , இசை பாடல்கள் என அனைத்து பொறுப்புகளையும் ஏற்று ஒரு கட்டம் வரை வெற்றிகரமாக செயல்பட்டவர். ஆனால் இவரும் 90 களுக்குப் பிறகு ஆட்டத்தில் இருந்து வெளியேறினார்.

இவர்கள் இருவரும் தமிழ் சினிமாவில் ஒரு திருப்புமுனையை ஏற்படுத்தியவர்கள் என்று சொன்னால் அது மிகையாகாது. இவர்களின் வருகைக்கு முன்பு தமிழ் சினிமாவில் கதாசிரியர்கள் என்று தனியாக ஆட்கள் இருப்பார்கள். அவர்கள் கதை எழுதுவார்கள். அதை இயக்குனர்கள் திரைக்கதை அமைத்து இயக்குவார்கள். ஆனால் பாக்யராஜ் மற்றும் டி ராஜேந்தர் ஆகியோர் வந்தபோது, அவர்களே கதை, திரைக்கதை, வசனம் எழுதி இயக்கினார்கள். அவர்கள் அந்த ஸ்டைலில் வெற்றி பெற்றதால் அதையே அதன் பின்வந்த இயக்குனர்கள் தொடர வேண்டிய கட்டாயத்துக்கு ஆளானார்கள். அதனால் ஒரு கட்டத்தில் எழுத்தாளர்களுக்கான முக்கியத்துவம் இல்லாமல் போனது. இப்போது இருக்கும் சொற்ப எழுத்தாளர்களுக்கும் மரியாதையோ சரியான சம்பளமோ கொடுக்கப்படுவதில்லை.