“கண்ணை மூடு.. உனக்கு ஒரு சர்ப்ரைஸ்”… காதலியின் பேச்சை நம்பிய இளைஞனுக்கு நேர்ந்த கொடூரம்…. பெங்களூரை நடுங்க வைத்த சம்பவம்…!

பெங்களூரில் காதலை வெளிப்படுத்துவதாகக் கூறி, காதலனை வீட்டிற்கு வரவழைத்து தீயிட்டு எரித்துக் கொன்ற இளம்பெண்ணின் செயல் பெரும் அதிர்ச்சியை ஏற்படுத்தியுள்ளது. பெங்களூர் அஞ்சனா நகரைச் சேர்ந்த பிரேமா (27) மற்றும் ராஜாஜி நகரில் உள்ள ஒரு தனியார் நிறுவனத்தில் பணியாற்றிய கிரண் (27) ஆகிய இருவரும் கடந்த சில காலமாகக் காதலித்து வந்துள்ளனர். சமீபகாலமாக கிரண் தன்னைத் தவிர்ப்பதாக எண்ணிய பிரேமா, அவர் மீது கடும் கோபத்தில் இருந்துள்ளார்.

சம்பவத்தன்று, வேலை முடிந்து திரும்பிய கிரணை தனது வீட்டிற்கு வரும்படி பிரேமா அழைத்துள்ளார். வீட்டில் யாரும் இல்லாத நேரத்தில், “மேற்கத்திய பாணியில்” (Western Style) உன்னிடம் காதலைப் பகிர்ந்து கொள்ளப் போகிறேன் என்று ஆசையாகக் கூறி கிரணை நம்ப வைத்துள்ளார். இதனை உண்மை என்று நம்பிய கிரணும் அதற்குச் சம்மதித்துள்ளார். காதலியின் விபரீத எண்ணத்தை அறியாத அவர், பிரேமாவின் திட்டத்திற்குத் தன்னை முழுமையாக ஒப்படைத்தார்.

திட்டமிட்டபடி கிரணின் கை, கால்களைக் கயிற்றால் கட்டிய பிரேமா, அவரது கண்களையும் கறுப்புத் துணியால் கட்டியுள்ளார். இதுகுறித்து கிரண் கேட்டபோது, “உனக்கு ஒரு பெரிய சர்ப்ரைஸ் (Surprise) காத்திருக்கிறது” என்று கூறி அவரை அமைதிப்படுத்தியுள்ளார். பின்னர் யாரும் எதிர்பாராத விதமாக, மறைத்து வைத்திருந்த மண்ணெண்ணெயை அவர் மீது ஊற்றி தீ வைத்துள்ளார். கை, கால்கள் கட்டப்பட்டிருந்ததால் தப்பிக்க வழியின்றி கிரண் அலறியபடியே தீயில் கருகி சம்பவ இடத்திலேயே பரிதாபமாக உயிரிழந்தார்.

இந்தக் கொடூரச் செயலை பிரேமா தனது செல்போனில் வீடியோவாகவும் பதிவு செய்துள்ளதாகக் கூறப்படுகிறது. அலறல் சத்தம் கேட்டு வந்த அக்கம் பக்கத்தினர் அளித்த தகவலின் பேரில் பேடரஹள்ளி போலீசார் விரைந்து வந்து பிரேமாவைக் கைது செய்தனர். காதலிப்பதாகக் கூறிவிட்டு ஏமாற்றியதால் ஏற்பட்ட ஆத்திரத்தில் இக்கொலையைச் செய்ததாகப் முதற்கட்ட விசாரணையில் தெரியவந்துள்ளது. இந்தச் சம்பவம் பெங்களூர் மக்களிடையே மிகுந்த அச்சத்தையும் அதிர்ச்சியையும் ஏற்படுத்தியுள்ளது.