கொலை, கற்பழிப்பு, திருட்டு வழக்குகளில் தப்பிக்க… வெறும் ரூ.20,000 இருந்தா மட்டும் போதும்… போலி ஆவணம் மூலம் ஜாமின் வாங்கி கொடுத்த கும்பல்..!

கொலை, திருட்டு மற்றும் பாலியல் வன்கொடுமை என எந்த ஒரு வழக்கில் கைதாகி சிறையில் இருந்தாலும் அவர்களுக்கு போலி ஆவணங்கள் மூலமாக ஜாமீன் பெற்று தரக்கூடிய மோசடி கும்பலை உத்தரப்பிரதேச காவல்துறையினர் கைது செய்துள்ளனர். போலியான நில வருவாய் ஆவணங்கள், போலியான ஆதார் அட்டைகள் மற்றும் ஜோடிக்கப்பட்ட அடையாள ஆவணங்களை பயன்படுத்தி குற்றம் சாட்டப்பட்டவர்களுக்கு ஜாமீன் கிடைக்க உதவும் விதமாக தொழில் முறை ஜாமின் தாரர்களாக இந்த குழு செயல்பட்டு வந்துள்ளது தெரியவந்துள்ளது.

இதுவரை போலீசார் நடத்திய விசாரணையில் இந்த மோசடி கும்பல் 23 வழக்குகளில் குற்றவாளிகளுக்கு ஜாமீன் பெற்று தந்துள்ளது. இதற்காக ஒரு வழக்குக்கு சுமார் 20000 ரூபாய் வரை வசூலித்துள்ளனர். இந்த வழக்கில் கொலை வழக்கில் தண்டனை பெற்று ஜாமினில் வெளிவந்த குற்றவாளி உட்பட ஆறு பேர் கைது செய்யப்பட்டுள்ளனர். இந்த சம்பவம் அம்மாநிலத்தில் அதிர்ச்சியை ஏற்படுத்தி உள்ள நிலையில் இது குறித்து போலீசார் தொடர் விசாரணை நடத்தி வருகிறார்கள்.