பல்கேரியாவைச் சேர்ந்த பார்வையற்ற பெண்மணியான பாபா வாங்கா, எதிர்காலத்தைக் கணிக்கும் ஆற்றல் கொண்டவராக அறியப்படுகிறார். கொரோனா தொற்று, இரட்டை கோபுரத் தாக்குதல், இளவரசி டயானாவின் மரணம் போன்ற வரலாற்று நிகழ்வுகளை முன்கூட்டியே கணித்ததாக நம்பப்படும் இவரது 2027ஆம் ஆண்டிற்கான கணிப்புகள் தற்போது வெளியாகியுள்ளன. அதில், ஒரு மர்மமான நோய் அல்லது மரபணு சார்ந்த அறிவியல் பரிசோதனைகள் காரணமாகச் சில மனிதர்களுக்கு அசாதாரணமான ‘சூப்பர் ஹியூமன்’ சக்திகள் கிடைக்கும் என்ற விசித்திரமான கணிப்பு உலக அளவில் பெரும் கவனத்தை ஈர்த்துள்ளது.
2026ஆம் ஆண்டைப் பொறுத்தவரை, பாபா வாங்காவின் பல கணிப்புகள் நிஜமாகின, சில தவறாகவும் முடிந்தன. கிழக்கு மற்றும் மேற்கத்திய நாடுகளுக்கிடையேயான போர்ச் சூழல், வெனிசுலா, ஜப்பான், நேபாளம் ஆகிய இடங்களில் ஏற்பட்ட இயற்கைச் சீற்றங்கள் மற்றும் செயற்கை நுண்ணறிவால் ஏற்பட்ட பணிநீக்கங்கள் போன்றவை அவர் கணித்தபடியே நடந்தேறின. இருப்பினும், ரஷ்ய அதிபர் புதின் ‘சுப்ரீம் லீடராக’ உயர்வது போன்ற கணிப்புகள் தற்போதைய போர்ச் சூழலில் பலனளிக்கவில்லை. மேலும், 2026 நவம்பரில் வேற்றுக்கிரகவாசிகளின் விண்கலம் பூமிக்கு வரும் என்ற அவரது மற்றொரு கணிப்பும் இன்னும் நிலுவையில் உள்ளது.
இருப்பினும், 2027இல் மனிதர்களில் ஒரு சிலருக்கு ‘சூப்பர் பவர்’ கிடைக்கும் என்ற செய்திதான் தற்போது இணையத்தில் வைரலாகி விவாதிக்கப்பட்டு வருகிறது. குறிப்பிட்ட நோயால் பாதிக்கப்படும் அல்லது ஆய்வுக்கு உட்படுத்தப்படும் மக்களில் சிலருக்கு மட்டுமே இந்த அசாதாரண சக்திகள் கிட்டும் என அவரது ஆதரவாளர்கள் நம்புகின்றனர். அறிவியலுக்கு அப்பாற்பட்ட இந்த விசித்திரக் கணிப்பு நிஜமாகுமா அல்லது மற்ற சில கணிப்புகளைப் போலப் பொய்யாகுமா என்பதைப் பொறுத்திருந்துதான் பார்க்க வேண்டும்.