ராஜஸ்தான் மாநிலம் ஜெய்ப்பூர் கிராமப்புற எல்லைக்குட்பட்ட நரேனா போலிஸ் சரகத்தில் உள்ள பிங்குன் கிராமத்தைச் சேர்ந்த சுரேஷ் என்ற வாலிபர், செப்டம்பர் 20 மாலை பெட்ரோல் பங்க் ஒன்றில் தனது மோட்டார் சைக்கிளுக்கு எரிபொருள் நிரப்பிக் கொண்டிருந்தார். அப்போது ஒரே கிராமத்தைச் சேர்ந்த சைத்தான் என்பவர், இருவருக்கும் இடையே இருந்த பணத் தகராறு காரணமாகத் தனது டிராக்டருடன் அங்கு வந்துள்ளார்.
சுரேஷைப் பார்த்ததும் ஆத்திரமடைந்த சைத்தான், சற்றும் எதிர்பார்க்காத வேளையில் டிராக்டரை நேராகச் சுரேஷ் மீது ஏற்றிப் படுகொலை செய்ய முயன்றுள்ளான். நொடிப் பொழுதில் சாதுர்யமாகச் செயல்பட்ட சுரேஷ், டிராக்டரின் பாதையிலிருந்து விலகி பெட்ரோல் பங்க் கட்டிடம் மற்றும் அருகில் இருந்த வயல்வெளியை நோக்கி அலறியடித்து ஓடித் தப்பினார்.
ஆத்திரம் அடங்காத சைத்தான், சுரேஷின் மோட்டார் சைக்கிள் மீது டிராக்டரைத் திரும்பத் திரும்ப ஏற்றி அதை முழுமையாக மிதித்துத் துவம்சம் செய்தான். இந்த பயங்கர வெறியாட்டத்தின் காட்சிகள் அங்கிருந்த சிசிடிவி கேமராவில் பதிவாகி வைரலான நிலையில், நரேனா போலீசார் வழக்குப் பதிவு செய்து, தலைமறைவாக இருந்த காவாலி சைத்தானை அதிரடியாகக் கைது செய்து சிறையில் அடைத்தனர்.