“அண்ணாமலைக்கு செக் வைத்த பாஜக”… திமுக-வை வீழ்த்த அமித்ஷா போட்ட ‘ஸ்கெட்ச்’ இதுதான்…. குருமூர்த்தி வெளியிட்ட பரபரப்பு தகவல்…!

தமிழக பாஜகவின் முன்னாள் மாநிலத் தலைவர் அண்ணாமலை அப்பதவியிலிருந்து விலகியது தன்னிச்சையான முடிவல்ல, அது பாஜக தலைமையுடன் இணைந்து எடுக்கப்பட்ட ஒரு திட்டமிட்ட அரசியல் நகர்வு என்று துக்ளக் இதழின் ஆசிரியர் குருமூர்த்தி தெரிவித்துள்ளார். சென்னையில் நடைபெற்ற துக்ளக் இதழின் 56-வது ஆண்டு நிறைவு விழாவில் வாசகர்களின் கேள்விகளுக்குப் பதிலளித்த அவர், அண்ணாமலையின் வெளியேற்றம் மத்திய உள்துறை அமைச்சர் அமித் ஷாவின் நீண்டகால அரசியல் வியூகத்தின் ஒரு பகுதி என்பதை உறுதிப்படுத்தினார்.

தமிழகத்தில் ஆளும் திமுக அரசை வீழ்த்த வேண்டும் என்பதே பாஜகவின் தற்போதைய முக்கிய இலக்கு என்றும், அதற்காக சில அரசியல் யதார்த்தங்களுக்கு ஏற்ப உத்திகளை மாற்றியமைக்க வேண்டிய அவசியம் ஏற்பட்டுள்ளதாகவும் குருமூர்த்தி விளக்கினார். குறிப்பாக, எடப்பாடி பழனிசாமி தலைமையிலான அதிமுகவுடன் கூட்டணி அமைப்பதற்கான முட்டுக்கட்டைகளை நீக்கவே இத்தகைய மாற்றங்கள் செய்யப்பட்டுள்ளதாகக் கருதப்படுகிறது. அமித் ஷா ஒரு திறமையான வியூகவாதி என்றும், மகாராஷ்டிராவில் பாஜக ஆட்சியைக் கைப்பற்றியது போன்ற ஒரு வெற்றியைத் தமிழகத்திலும் நிகழ்த்த அவர் களம் இறங்கியிருப்பதாகவும் அவர் குறிப்பிட்டார்.

மேலும், அண்ணாமலையின் எதிர்காலப் பங்கு குறித்தும் குருமூர்த்தி நம்பிக்கை தெரிவித்தார். கட்சிப் பொறுப்பில் இருந்து விலகினாலும், அமித் ஷாவின் புதிய வியூகங்களுக்கு அண்ணாமலை முழு ஒத்துழைப்பு வழங்குவார் என்றும், திமுகவை ஆட்சியில் இருந்து அகற்ற தேவையான களப்பணிகளில் அவர் தொடர்ந்து ஈடுபடுவார் என்றும் அவர் கூறினார். அதே சமயம், தமிழகத்தில் புதிய அரசியல் சக்தியாக உருவெடுத்துள்ள நடிகர் விஜய்யின் தமிழக வெற்றிக் கழகத்தை ஒரு தீவிரமான அரசியல் கட்சியாகத் தான் கருதவில்லை என்றும் அவர் துணிச்சலாகத் தெரிவித்தார்.