நீங்க போயிட்டு வாங்க அண்ணாமலை…. “டெல்லி போட்ட ரகசிய ஸ்கெட்ச்… அண்ணாமலையை ‘டிரம்ப் கார்டாக’ மாற்றும் அமித்ஷா?… தமிழக அரசியலில் அடுத்த புயல்….!

தமிழக பாஜக தலைவராக இருந்த கே. அண்ணாமலை தனது கட்சிப் பொறுப்பைத் துறந்து விலகியிருப்பது, தமிழக அரசியல் களத்தில் பெரும் பரபரப்பையும் அதிர்வலைகளையும் ஏற்படுத்தியுள்ளது. ஜூன் 2-ம் தேதி டெல்லியில் பாஜக தேசியத் தலைவர் நிதின் நபின், பொதுச் செயலாளர் பி.எல். சந்தோஷ் மற்றும் உள்துறை அமைச்சர் அமித் ஷா ஆகியோரை அண்ணாமலை நேரில் சந்தித்துப் பேசினார். ஆரம்பத்தில் அவரை சமாதானப்படுத்த கட்சித் தலைமை முயன்ற போதிலும், தனது முடிவில் அவர் உறுதியாக இருந்ததால், இறுதியில் உள்துறை அமைச்சர் அமித் ஷா அவரது விலகலுக்குப் ‘பச்சைக்கொடி’ காட்டியதாக நம்பத்தகுந்த வட்டாரங்கள் தெரிவிக்கின்றன.

தனது விலகல் தொடர்பாக அண்ணாமலை எழுதியுள்ள ஐந்து பக்க கடிதத்தில், கடந்த நான்கு ஆண்டுகளாக தனக்கு ஆதரவளித்த மத்திய தலைமைக்கு நன்றி தெரிவித்துள்ள அதே வேளையில், அண்மைக் காலமாக தான் திட்டமிட்டு ஓரங்கட்டப்பட்டதை கடுமையாக விமர்சித்துள்ளார். குறிப்பாக, கடந்த 2024 மக்களவைத் தேர்தலில் 11% வாக்கு பங்கைப் பெற்ற பாஜக, நடந்து முடிந்த 2026 சட்டமன்றத் தேர்தலில் வெறும் 3% ஆக சரிவடைவதற்கும், 4 இடங்களிலிருந்து ஒரே ஒரு இடமாகக் கட்சி சுருங்குவதற்கும் அதிமுகவுடன் கூட்டணி வைத்ததே முக்கிய காரணம் என நேரடியாகக் குற்றம் சாட்டியுள்ளார். தமிழகத்தில் தனித்து நின்று அடிமட்ட அமைப்பை வலுப்படுத்த வேண்டும் என்பதே தனது நிலைப்பாடு என்றும் அவர் அதில் வலியுறுத்தியுள்ளார்.

அண்ணாமலையின் இந்த அதிரடி முடிவின் பின்னணியில் நடிகர் விஜய்யின் ‘தமிழக வெற்றிக் கழகம்’ (தவெக) வருகையும் ஒரு முக்கிய காரணியாகப் பார்க்கப்படுகிறது. தனது ‘என் மண் என் மக்கள்’ யாத்திரையின் போது தன்பக்கம் ஈர்க்கப்பட்ட இளைஞர் அலை, பாஜக மேலிடம் தன்னை ஓரங்கட்டியதால் விஜய் பக்கம் திரும்புவதை அண்ணாமலை உணர்ந்துள்ளார். திராவிட அரசியலுக்கு மாற்றாக ஒரு புதிய சக்தியை மக்கள் எதிர்பார்ப்பதும், தேசிய அடையாளத்துடன் களமிறங்கினால் தமிழகத்தில் முழு அங்கீகாரம் கிடைக்காது என்பதைப் புரிந்துகொண்டதுமே, அவர் இந்த தீர்க்கமான முடிவை எடுக்கக் காரணமாக இருந்துள்ளது. அண்ணாமலை தனித்த பிராந்திய சக்தியாக உருவெடுத்தால், அது நீண்டகாலத்தில் திராவிட அரசியலை பலவீனப்படுத்தி தங்களுக்குப் சாதகமாக அமையும் என டெல்லி பாஜக தலைமையும் கணக்கு போடுகிறது.

அடுத்த கட்டமாக, அண்ணாமலை உடனடியாகப் புதிய கட்சியை அறிவிக்கப் போவதில்லை என்று தெரிகிறது. அதற்குப் பதிலாக, ஊழல் எதிர்ப்பு, இளைஞர் வேலைவாய்ப்பு மற்றும் வாழ்வாதாரப் பிரச்சினைகளை முன்னிறுத்தி ஒரு பிரம்மாண்ட ‘மக்கள் இயக்கம்’ ஒன்றை அவர் தொடங்க உள்ளார். அடுத்த 6 முதல் 8 மாதங்களில் தமிழகம் முழுவதும் இந்த இயக்கத்தின் மூலம் வலுவான அடித்தளத்தை உருவாக்கி, பின்னர் ‘தமிழ் அடையாளம்’ மற்றும் ‘சுத்தமான நிர்வாகம்’ ஆகியவற்றை மையமாகக் கொண்ட ஒரு முழுமையான அரசியல் கட்சியாக அதனை மாற்றத் திட்டமிட்டுள்ளார். இதனிடையே, அண்ணாமலையின் விலகலால் தமிழக பாஜகவில் பெரும் பதற்றம் நிலவி வரும் சூழலில், தற்போதைய மாநிலத் தலைவர் நயினார் நாகேந்திரன் அவசர அவசரமாக டெல்லி புறப்பட்டுச் சென்றுள்ளார். அண்ணாமலையின் இந்த தனிப்பாதை தமிழக அரசியலில் ஒரு புதிய திருப்பத்தை ஏற்படுத்தும் என எதிர்பார்க்கப்படுகிறது.