“மரண பயத்தில் தமிழர்கள், நடுவழியில் நின்ற விமானம்”.. மனிதநேயம் இன்னும் சாகவில்லை.. போர் பதற்றத்திற்கு மத்தியிலும் 192 தமிழர்களை மீட்ட ‘அன்னை தமிழ் மன்றம்..!!!

மத்திய கிழக்கு நாடுகளில் நிலவி வரும் போர்ச் சூழல் காரணமாக பஹ்ரைனில் சிக்கித் தவித்த தமிழர்களை, ‘அன்னை தமிழ் மன்றம்’ மனிதாபிமான அடிப்படையில் பத்திரமாக மீட்டு தாயகத்திற்கு அனுப்பி வைத்துள்ளது. ஈரான் – இஸ்ரேல் பதற்றம் மற்றும் போர் அச்சம் காரணமாக பஹ்ரைன் விமான நிலையம் தற்காலிகமாக மூடப்பட்டதால், கர்ப்பிணிப் பெண்கள், பச்சிளம் குழந்தைகள் மற்றும் முதியவர்கள் உட்பட ஏராளமான தமிழர்கள் தங்கள் ஊர்களுக்குத் திரும்ப முடியாமல் கடும் அவதிக்குள்ளாகினர்.

இந்த இக்கட்டான சூழலில், அன்னை தமிழ் மன்றத்தின் நிர்வாகிகள் எடுத்த துரித நடவடிக்கையினால், வளைகுடா ஏர் நிறுவனத்துடன் இணைந்து சவுதி அரேபியா வழியாக சென்னைக்கு ஒரு சிறப்பு விமானம் ஏற்பாடு செய்யப்பட்டது. இந்த மீட்பு நடவடிக்கையின் மூலம் சுமார் 192 பயணிகள் பஹ்ரைனிலிருந்து பாதுகாப்பாக சென்னைக்கு அனுப்பி வைக்கப்பட்டனர்.

மேலும் அன்னை தமிழ் மன்றத்தின் தலைவர் செந்தில் G.K, பொதுச் செயலாளர் M. பழனிச்சாமி மற்றும் மன்றத்தின் பிற உறுப்பினர்கள் ஒன்றிணைந்து, டிவிஎஸ் பயண முகவர் மற்றும் இந்திய தூதரகத்தின் ஒத்துழைப்போடு இந்த இமாலய பணியைச் சாத்தியமாக்கினர். போரின் பயத்தை விட மனிதநேயமே பெரியது என்பதை நிரூபிக்கும் வகையில் அமைந்த இந்த முயற்சிக்கு, மீட்கப்பட்ட தமிழர்களும் அவர்களின் குடும்பத்தினரும் தங்களது நெஞ்சார்ந்த நன்றிகளைத் தெரிவித்துள்ளனர்.