“இதுதான் வாழ்க்கை” கனத்த இதயத்துடன் மீண்டும் பணிக்கு திரும்பிய அஜித்.. தாயின் மறைவுக்குப் பின் வெளியிட்ட உருக்கமான பதிவு..!!

நடிகர் அஜித் குமார் கார் பந்தயங்களில் தீவிர கவனம் செலுத்தி வரும் சூழலில், சமீபத்தில் அவரது தாயார் மோகினி மணி (89) வயது முதிர்வு காரணமாக காலமானார். துபாயில் இருந்த அஜித், இந்தச் செய்தி கேட்டு சென்னை விரைந்து வந்து இறுதிச் சடங்குகளைச் செய்தார். ஏற்கனவே தந்தையை இழந்த நிலையில், தாயையும் இழந்த அஜித்துக்கு தமிழக முதலமைச்சர் விஜய் உள்ளிட்ட பல முக்கிய பிரமுகர்கள் நேரில் சென்று தங்களது ஆழ்ந்த இரங்கலையும் ஆறுதலையும் தெரிவித்தனர்.

தாயின் மறைவுக்குப் பிறகு அஜித்தின் ‘ஏகே ரேஸிங்’ இன்ஸ்டாகிராம் பக்கத்தில், அவர் பந்தய உடையில் இருக்கும் புகைப்படத்துடன் ஒரு உருக்கமான பதிவு பகிரப்பட்டுள்ளது. அதில், “கனத்த இதயத்துடன் மீண்டும் பணிக்குத் திரும்பியிருக்கிறேன், வாழ்க்கை தொடர வேண்டுமே” என்று குறிப்பிடப்பட்டுள்ளது. சோகத்திலிருந்து மீண்டு அவர் மீண்டும் தனது ரேஸிங் பணிகளுக்குத் திரும்பியிருப்பதை உணர்த்தும் இப்பதிவு, ரசிகர்களிடையே நெகிழ்ச்சியையும் ஆறுதல் வார்த்தைகளையும் பெற்று வருகிறது.

முன்னதாக, அஜித்தின் தாயார் மறைந்தபோது அவரும் அவரது சகோதரர்களும் இணைந்து வெளியிட்ட அறிக்கையில், தங்கள் பெற்றோரின் அன்பான நினைவுகள் தங்களுக்கு என்றும் வலிமையளிக்கும் எனக் குறிப்பிட்டிருந்தனர். மேலும், அஜித்தின் திரைப்பயணத்தைப் பொறுத்தவரை கடந்த வருடத்தில் ‘குட் பேட் அக்லி’, ‘விடாமுயற்சி’ ஆகிய திரைப்படங்கள் வெளியாகின. அடுத்ததாக அவர் ஆதிக் ரவிச்சந்திரன் இயக்கத்தில் நடிக்கவிருக்கிறார்; இப்படத்தின் படப்பிடிப்பு தொடங்குவதற்குள் சில கார் பந்தயங்களில் பங்கேற்கவும் அவர் திட்டமிட்டுள்ளார்.