“2 மாத லிவ்-இன் வாழ்க்கை.. 12 நாள் பிணம்..! நடிகை ஊர்மிளா செய்த பகீர் காரியம் – பதற வைக்கும் பின்னணி..!!”

பெங்களூருவில் கன்னடத் துணை நடிகை ஒருவர், தனது காதலனுடன் சேர்ந்து லிவ்-இன் முறையில் வாழ்ந்து வந்த கூட்டாளியைப் படுகொலை செய்துள்ள அதிர்ச்சிகரமான சம்பவம் பெரும் பரபரப்பை ஏற்படுத்தியுள்ளது. ‘பஜரங்கி’, ‘போலீஸ் குவார்ட்டர்ஸ்’ போன்ற படங்களில் சிறு வேடங்களில் நடித்த பிந்து (என்கிற ஊர்மிளா), மோகன் ராவ் என்ற 45 வயது நபருடன் கடந்த இரண்டு மாதங்களாக மஞ்சுநாத் நகரில் உள்ள வாடகை வீட்டில் வசித்து வந்தார். ஏற்கனவே திருமணமான இவர்கள் இருவரும், தங்கள் துணையைப் பிரிந்து ஒன்றாக வாழ்ந்து வந்துள்ளனர்.

இந்நிலையில், பிந்துவுக்கும் வினய் என்ற லாரி ஓட்டுநருக்கும் இடையே காதல் மலர்ந்துள்ளது. இவர்கள் இருவரும் திருமணம் செய்துகொள்ள முடிவெடுத்தபோது, அதற்கு மோகன் ராவ் கடும் எதிர்ப்பு தெரிவித்துள்ளார். இதனால் தங்களுக்கு இடையூறாக இருக்கும் மோகனைத் தீர்த்துக்கட்ட பிந்துவும் வினய்யும் திட்டமிட்டனர். இதற்காக வினய்யின் நண்பரான தனுஷ் என்பவரின் உதவியையும் அவர்கள் நாடியுள்ளனர். கடந்த பிப்ரவரி 18-ம் தேதி திட்டமிட்டபடி வீட்டில் மது விருந்து (Party) ஒன்றிற்கு ஏற்பாடு செய்துள்ளனர்.

அந்த விருந்தின்போது மோகன் ராவுக்கும் மற்றவர்களுக்கும் இடையே வாக்குவாதம் ஏற்பட்டுள்ளது. அப்போது போதையில் இருந்த மோகன் ராவை வினய் கத்தியால் குத்தியுள்ளார். அவர் அலறாமல் இருக்க பிந்துவும் மற்றவர்களும் சேர்ந்து அவரது வாய் மற்றும் மூக்குப் பகுதியை செல்லோ டேப் (Cello Tape) கொண்டு ஒட்டி மூடியுள்ளனர். இதில் மூச்சுத்திணறல் ஏற்பட்ட மோகன் ராவ் சம்பவ இடத்திலேயே உயிரிழந்தார். பின்னர் உடலை வீட்டிற்குள்ளேயே போட்டுப் பூட்டிவிட்டு மூவரும் தப்பியோடினர்.

சுமார் 12 நாட்களுக்குப் பிறகு அந்த வீட்டிலிருந்து துர்நாற்றம் வீசவே, அக்கம் பக்கத்தினர் அளித்த தகவலின் பேரில் காவல்துறையினர் வந்து பார்த்தபோது உடல் அழுகிய நிலையில் மீட்கப்பட்டது. செல்போன் சிக்னல்களை வைத்துத் துப்புத் துலக்கிய போலீசார், நடிகை பிந்து, வினய் மற்றும் தனுஷ் ஆகிய மூவரையும் கைது செய்துள்ளனர். சினிமாவில் வாய்ப்பு தேடி வந்த ஒரு நடிகை, தனது திருமண ஆசைக்காக ஒரு உயிரைப் பறித்த சம்பவம் கன்னடத் திரையுலகில் பெரும் அதிர்ச்சியை ஏற்படுத்தியுள்ளது.