அதிமுகவுடன் கூட்டணி…. இரவோடு இரவாக இபிஎஸ்-க்கு இன்பதிர்ச்சி கொடுத்த முக்கிய புள்ளி…. தமிழக அரசியலில் அதிரடி டுவிஸ்ட்..!

விழுப்புரம் மாவட்ட அரசியலில் பெரும் பரபரப்பை ஏற்படுத்தியுள்ள நிகழ்வாக, ஓ.பன்னீர்செல்வம் அணியின் முக்கியத் தூணாக விளங்கிய முன்னாள் நாடாளுமன்ற உறுப்பினர் செஞ்சி வெ.ஏழுமலை, அக்கட்சியில் இருந்து விலகி எடப்பாடி பழனிசாமி தலைமையிலான அதிமுகவில் இணைந்துள்ளார். சென்னையில் உள்ள அதிமுக தலைமை அலுவலகத்தில் பொதுச்செயலாளர் இபிஎஸ்-ஐ நேரில் சந்தித்த அவர், மலர்க்கொத்து வழங்கி தன்னை மீண்டும் தாய்க்கழகத்தில் இணைத்துக் கொண்டார். ஓ.பி.எஸ்-ன் ‘அதிமுக உரிமை மீட்புக் குழுவின்’ விழுப்புரம் மாவட்டச் செயலாளராகச் செயல்பட்டு வந்த ஏழுமலையின் இந்த திடீர் மாற்றம், அந்த மாவட்டத்தில் ஓ.பி.எஸ் அணிக்குப் பலத்த பின்னடைவாகக் கருதப்படுகிறது.

சட்டமன்றத் தேர்தல் நெருங்கி வரும் சூழலில், செஞ்சி ஏழுமலையின் இந்த முடிவு வட மாவட்டங்களில் அதிமுகவின் கரத்தை வலுப்படுத்தும் என எதிர்பார்க்கப்படுகிறது. “கட்சியின் ஒற்றுமை மற்றும் வலிமைக்காகவே இந்த முடிவை எடுத்துள்ளேன்” என தனது இணைப்பு குறித்து அவர் விளக்கம் அளித்துள்ளார். ஏற்கனவே ஓ.பி.எஸ் அணியில் இருந்து முக்கிய நிர்வாகிகள் பலர் விலகி வரும் நிலையில், விழுப்புரம் மாவட்டத்தின் ஒரு முக்கிய முகம் இபிஎஸ் பக்கம் சாய்ந்திருப்பது தமிழக அரசியலில் உற்றுநோக்கப்படும் ஒன்றாக மாறியுள்ளது.