தொலைக்காட்சி தொகுப்பாளராக தனது பயணத்தைத் தொடங்கி, தெலுங்குத் திரையுலகில் ‘புஷ்பா’, ‘ரங்கஸ்தலம்’, ‘க்ஷணம்’ போன்ற வெற்றிப் படங்களின் மூலம் முன்னணி நடிகையாக உயர்ந்தவர் அனுசுயா பரத்வாஜ். சமூக வலைத்தளங்களில் எப்போதுமே தனது கருத்துகளைத் துணிச்சலாக முன்வைக்கும் அவர், தற்போது கணவனை இழந்த பெண்களுக்குச் சமூகம் விதிக்கும் பழங்காலக் கட்டுப்பாடுகள் மற்றும் சடங்குகள் குறித்து எழுப்பியுள்ள கேள்விகள் இணையத்தில் பெரும் விவாதத்தை உருவாக்கியுள்ளன.
மூன்று ஆண்டுகளுக்கு முன்பு தனது தந்தை காலமான பிறகு, தன் தாயின் வாழ்வில் நிகழ்ந்த கட்டாய மாற்றங்களே தன்னை இந்தக் கேள்வியைக் கேட்கத் தூண்டியதாக அவர் குறிப்பிட்டுள்ளார். சிறுவயதிலிருந்தே ஒரு பெண் தனது தாய் மற்றும் பாட்டியிடம் இருந்துதான் பொட்டு வைப்பது, வளையல் அணிவது, மெஹந்தி வைத்துக்கொள்வது போன்ற அலங்காரங்களைக் கற்றுக்கொள்கிறாள். அப்படிப்பட்ட விஷயங்கள் திருமணத்திற்குப் பிறகு மட்டும் எப்படி ஒரு ஆணின் ஆயுளோடு தொடர்புடையதாக மாற முடியும் என்றும், கணவனை இழந்ததற்காகப் பெண்கள் ஏன் தங்களுக்குப் பிடித்தமான அலங்காரங்களைத் துறக்க வேண்டும் என்றும் அவர் ஆதங்கத்துடன் கேள்வி எழுப்பியுள்ளார்.
எந்தவொரு மதத்தையோ அல்லது கலாச்சாரத்தையோ புண்படுத்துவது தனது நோக்கமல்ல என்பதைத் தெளிவுபடுத்தியுள்ள அனுசுயா, ஒரு பெண் தன்னை எப்படி அலங்கரித்துக்கொள்ள வேண்டும் என்பது அவளது முழுமையான தனிப்பட்ட விருப்பம் என்று கூறியுள்ளார். கணவனின் இறப்பிற்குப் பிறகு ஒரு பெண்ணின் வாழ்க்கை முறையை இந்தச் சமூகம் தீர்மானிக்கக் கூடாது என்ற அவரது ஆழமான பதிவு இணையத்தில் இருவேறு தரப்பு விமர்சனங்களைத் தோற்றுவித்துள்ளது. பலரும் அவரது இந்த முற்போக்கான சிந்தனைக்கு ஆதரவு தெரிவித்து வரும் நிலையில், ஒருசிலர் பாரம்பரியம் மற்றும் சடங்குகளைக் காரணம் காட்டி அவரது கருத்துக்கு எதிர்ப்பும் தெரிவித்து வருகின்றனர்.