தமிழ் சினிமாவில் காமெடி என்றால் அனைவருடைய நினைவுக்கும் வருவது விவேக் தான். தன்னுடைய நகைச்சுவையால் ஒட்டுமொத்த தமிழ் ரசிகர்களையும் கட்டி போட்டவர். நகைச்சுவை மூலம் சமூக கருத்துக்களை திரைப்படங்கள் மூலமாக நமக்கு வழங்கி வந்தவர். இப்படி புகழ்மிக்க கலைஞரான விவேக் மாரடைப்பு காரணமாக கடந்த 2021 ஆம் ஆண்டு காலமானார். இவருடைய இழப்பு தமிழ் திரை உலகிற்கு மட்டும் அல்லாமல் ரசிகர்களுக்கும் பெரும் அதிர்ச்சியை கொடுத்தது. இவர் இறந்ததற்குப் பிறகு திரையுலக நட்சத்திரங்களும் ரசிகர்களும் விவேக் குறித்து பல சுவாரசியமான நிகழ்வுகளை சமூக வலைத்தளங்களில் நினைவு கூர்ந்து வருகிறார்கள்.
அதன்படி நடிகர் விவேக், முன்னாள் பாரத பிரதமர் இந்திரா காந்திக்கு சிறுவயதில் எழுதிய கடிதத்தை ரசிகர்கள் அவருடைய பிறந்த நாளான இன்று சமூக வலைத்தளங்களில் வைரல் ஆக்கி வருகிறார்கள். விவேகானந்தர் என்ற இயற்பெயர் கொண்ட விவேக் நீலகிரி மாவட்டத்தின் குன்னுரை அடுத்த ஒட்டுப்பட்டறையில் உள்ள சாந்தி விஜயா ஜூனியர் பள்ளியில் இரண்டாம் வகுப்பு படித்துக் கொண்டிருந்தார்.
அப்போது முன்னாள் பாரத பிரதமர் இந்திரா காந்திக்கும் தனக்கும் ஒரே நாளில் பிறந்த தினம் என்று கூறியதை நினைவில் வைத்திருந்த விவேக் தனக்குத் தெரிந்த ஆங்கிலத்தில் பாரத பிரதமரான இந்திரா காந்திக்கு வாழ்த்து கடிதம் ஒன்றை எழுதியுள்ளார். அந்தக் கடிதத்தில், “my birthday your birthday same birthday, I wish you you wish me” என்று விவேக் குறிப்பிட்டு இருந்தார்.
தன்னுடைய பிறந்தநாளுக்கு வாழ்த்து தெரிவித்திருந்த விவேகுக்கு இந்திரா காந்தி கைப்பட பதில் கடிதம் ஒன்றையும் எழுதினார். அந்த கடிதத்தை விவேக் தன்னுடைய வாழ்நாள் முழுவதும் நீங்காத நினைவாக பத்திரப்படுத்தி வைத்திருந்தார். ஒரு நிகழ்ச்சியில் பங்கேற்ற விவேக், இந்திரா காந்தி தனக்கு கடிதம் எழுதிய நினைவுகளை பகிர்ந்திருந்தார். தற்போது அந்த கடிதம் இணையத்தில் வைரலாகி வருகிறது.