மதுராந்தகம் தொகுதி இடைத்தேர்தலை முன்னிட்டு நடைபெற்ற தமிழக வெற்றிக் கழகத்தின் வேட்பாளர் அறிமுகக் கூட்டத்தில், கட்சியின் முக்கிய நிர்வாகிகளான புஸ்ஸி ஆனந்த் மற்றும் ஆதவ் அர்ஜுனா ஆகியோர் கலந்துகொண்டு தீவிரப் பிரச்சாரத்தில் ஈடுபட்டனர். நிகழ்வில் பேசிய ஆதவ் அர்ஜுனா, தவெக தேர்தலில் வெற்றி பெற வாக்காளர்களுக்குப் பணம் கொடுக்க வேண்டிய அவசியமில்லை என்றும், தன்னிடம் பல நூறு கோடி ரூபாய் இருப்பதாகக் கூறப்படும் தகவல்களில் எவ்வித உண்மையும் இல்லை என்றும் தெளிவுபடுத்தினார்.
அவரைத் தொடர்ந்து பேசிய புஸ்ஸி ஆனந்த், தவெகவில் உள்ள நிர்வாகிகள், எம்.எல்.ஏ-க்கள் மற்றும் அமைச்சர்கள் என யாருமே பணம் சம்பாதிக்கும் நோக்கத்தோடு அரசியலுக்கு வரவில்லை என்று திட்டவட்டமாகக் கூறினார். தலைவர் விஜய் வழிகாட்டுதலின்படி மக்களுக்குச் சேவை செய்வதே ஒரே குறிக்கோள் எனக் குறிப்பிட்ட அவர், சிறிய தவறு செய்தாலும் அடுத்த வினாடியே பதவியிலிருந்து நீக்கக்கூடிய கண்டிப்பான தலைவர் விஜய் மட்டுமே என்றும், ஊழல் செய்யும் எந்தவொரு நிர்வாகியும் பதவியில் தொடர முடியாது என்றும் எச்சரித்தார். மேலும், எதிர்காலத்தில் தி.மு.க, அ.தி.மு.க ஆகிய இரு கட்சிகளும் இல்லாத நிலை உருவாகி, தமிழக வெற்றிக் கழகம் மட்டுமே ஒரே பெரிய அரசியல் சக்தியாகத் திகழும் என்றும் நம்பிக்கை தெரிவித்தார்.
தவெக தொண்டர்கள் தலைவர் விஜய் மீது வைத்துள்ள அன்பின் காரணமாகவே மணிக்கணக்கில் ஒரே இடத்தில் காத்திருப்பதாகக் கூறிய புஸ்ஸி ஆனந்த், கட்சி நிதி தொடர்பாகத் தங்கள் மீது வைக்கப்படும் அவதூறுகளை மறுத்தார். பத்திரிகைகளில் தங்களைப் பற்றிப் பல்வேறு தகவல்கள் எழுதப்பட்டாலும், எதையுமே நிரூபிக்க முடியவில்லை என்று சாடினார். ஒற்றை ரூபாய் தவறாகப் பெற்றாலும் தவெகவில் பதவியில் நீடிக்க முடியாது என்றும், தலைவரின் சொல் கேட்டுச் செயல்படும் ஊழியர்களாகவே அனைவரும் களப்பணியாற்றி வருவதாகவும் அவர் பெருமிதத்துடன் குறிப்பிட்டார்.
தனது உரையின் நிறைவாக நகைச்சுவையாகப் பேசிய புஸ்ஸி ஆனந்த், “எங்களுக்குக் காசு, பணம் சம்பாதிக்க வேண்டிய அவசியமே இல்லை; மக்கள் வீட்டிற்குச் சென்றால் காலையில் இட்லி, இரவில் இரண்டு தோசை சுட்டுக் கொடுத்தாலே போதும்” என்றார். தொடர்ந்து, தன்னிடம் பணமே இல்லை என்று மேடையில் ஆதவ் அர்ஜுனா பேசியதைச் சுட்டிக்காட்டிய அவர், “அவர் பணமில்லை என்று சொல்வதை இங்கு யாருமே நம்ப மறுக்கிறார்களே, அதற்கு நாம் என்ன செய்ய முடியும்?” என்று கிண்டலாகக் கூறியதும், மேடையில் இருந்தவர்களும் பொதுமக்களும் வாய்விட்டுச் சிரித்து மகிழ்ந்தனர்.