“நடுராத்திரியில் அதிரடி கைது”…. ரூ.100 கோடி பள்ளி மோசடி வழக்கில் சிக்கிய அன்பில் மகேஷ்…. எங்கே A2 முத்துக்குமார்?…. பரபரப்பு தகவல்….!

தனியார் பள்ளிகளுக்குப் போலி சான்றிதழ்கள் மற்றும் அனுமதிகளைப் பெற்றுத் தருவதாகக் கூறி ₹100 கோடிக்கும் அதிகமாக முறைகேடு செய்த வழக்கில், முன்னாள் அமைச்சர் அன்பில் மகேஷ் மத்திய குற்றப்பிரிவு (சிசிபி) போலீஸாரால் கைது செய்யப்பட்டுள்ளார். திமுக ஆட்சிக் காலத்தில் நிரந்தர அங்கீகாரம் மற்றும் டிடிசிபி (DTCP) அனுமதிகளை வழங்கி தருவதாகக் கூறி பணமோசடி செய்ததாகப் பள்ளி நிர்வாகிகள் அளித்த புகாரின் அடிப்படையில் இந்த நடவடிக்கை எடுக்கப்பட்டுள்ளது. இந்த வழக்கில் அன்பில் மகேஷ், தனியார் பள்ளி சங்க தலைவர் பி.டி. அரசகுமார், முன்னாள் எம்எல்ஏ முத்துக்குமார் உள்ளிட்ட பலர் மீது வழக்குப் பதிவு செய்யப்பட்டுள்ளது.

இந்த வழக்கில் ஏ1 குற்றவாளியாகச் சேர்க்கப்பட்ட அரசகுமார் ஏற்கனவே கைது செய்யப்பட்டு, அவர் மீது குண்டர் சட்டமும் பாயப்பட்டது. பின்னர் உயர்நீதிமன்றத்தால் குண்டர் சட்டம் ரத்து செய்யப்பட்டு, சென்னை ஊழல் தடுப்பு நீதிமன்றத்தின் நிபந்தனை ஜாமீனில் அவர் விடுவிக்கப்பட்டார். அரசகுமாரிடம் நடத்தப்பட்ட தீவிர விசாரணையின் அடிப்படையில் பெறப்பட்ட தகவல்களின் பேரிலேயே, அன்பில் மகேஷ் மீது குற்றப்பிரிவு போலீஸார் முதன்மை வழக்கைப் பதிவு செய்து விசாரணையைத் தீவிரப்படுத்தினர்.

இதனைத் தொடர்ந்து, கடந்த செப்டம்பர் 16-ஆம் தேதி அன்பில் மகேஷுக்குச் சொந்தமான இடங்களில் அதிரடி சோதனைகள் நடத்தப்பட்டு முக்கிய ஆவணங்களும் பென்டிரைவ்களும் கைப்பற்றப்பட்டன. பின்னர் செப்டம்பர் 18-ஆம் தேதி நடைபெற்ற முதற்கட்ட விசாரணையில், அவரிடம் சுமார் 8 மணி நேரத்திற்கும் மேலாக 240-க்கும் மேற்பட்ட கேள்விகள் கேட்கப்பட்டு வாக்குமூலங்கள் பதிவு செய்யப்பட்டன. இதனிடையே கைது நடவடிக்கையிலிருந்து தப்ப அன்பில் மகேஷ் தாக்கல் செய்திருந்த முன்ஜாமீன் மனுவை சென்னை உயர்நீதிமன்றம் தள்ளுபடி செய்து உத்தரவிட்டது.

முன்ஜாமீன் மனு விசாரணையின் போது, இந்த வழக்கின் ஏ2 குற்றவாளியான முன்னாள் எம்எல்ஏ முத்துக்குமாரை அன்பில் மகேஷ்தான் தலைமறைவாக இருக்க உதவி செய்து பாதுகாத்து வருகிறார் என்று காவல்துறை தரப்பில் பலத்த குற்றச்சாட்டு முன்வைக்கப்பட்டது. நீதிமன்றத் தீர்ப்பைத் தொடர்ந்து, அமைந்தகரையில் உள்ள திமுக எம்பி வில்சனின் அலுவலகத்தில் சட்ட ஆலோசனையில் ஈடுபட்டிருந்த அன்பில் மகேஷை சிசிபி போலீஸார் நேரில் சென்று அதிரடியாகக் கைது செய்தனர்.

கைது செய்யப்பட்ட அன்பில் மகேஷ் வேப்பேரியில் உள்ள காவல் ஆணையர் அலுவலகத்திற்கு அழைத்துச் செல்லப்பட்டு 2 மணி நேரத்திற்கும் மேலாகத் தீவிர விசாரணைக்கு உட்படுத்தப்பட்டார். அப்போது, தலைமறைவாக உள்ள ஏ2 குற்றவாளி முத்துக்குமார் எங்கே இருக்கிறார் என்பது குறித்தே முதன்மை கேள்விகள் எழுப்பப்பட்டதாகத் தெரிகிறது. மருத்துவப் பரிசோதனைகளுக்குப் பிறகு அவர் நீதிபதி முன் ஆஜர்படுத்தப்பட்டு சிறையில் அடைக்கப்படவுள்ளார்.