பெங்களூருவைச் சேர்ந்த 29 வயது இளைஞர் சுபம் சுக்லா, தனக்கு ஏற்கனவே திருமணமாகி மனைவி இருப்பதை மறைத்து, நெலமங்களாவைச் சேர்ந்த இளம்பெண் ஒருவரைத் திருமண ஆசை காட்டி ஏமாற்றியுள்ளார். அந்தப் பெண்ணை மும்பைக்கு வேலைக்குச் செல்வதாகத் தனது குடும்பத்தாரிடம் பொய் சொல்ல வைத்து, பெங்களூருவில் அவருடன் மூன்று ஆண்டுகள் ‘லிவ்-இன்’ முறையில் குடும்பம் நடத்தி வந்துள்ளார்.
இந்தக் காலகட்டத்தில், பல்வேறு காரணங்களைக் கூறி அந்தப் பெண்ணிடமிருந்து சுமார் 20 லட்சம் ரூபாய் பணம் மற்றும் 200 கிராம் தங்க நகைகளைப் பறித்துக் கொண்டதோடு, அவரது மைனர் தங்கைக்கும் பாலியல் ரீதியாகத் தொல்லை கொடுத்துள்ளார்.
சுபம் சுக்லாவிற்கு ஏற்கனவே குடும்பம் இருப்பதை அறிந்த அந்தப் பெண் இது குறித்துக் கேட்டபோது, மனைவியை விவாகரத்து செய்துவிடுவதாகக் கூறி மீண்டும் நம்ப வைத்து மோசடி செய்துள்ளார். ஒருகட்டத்தில் அவனது உண்மையான முகம் தெரிந்ததும், பாதிக்கப்பட்ட பெண் அளித்த புகாரின் அடிப்படையில் பாகலகுண்டே போலீசார் சுபம் சுக்லாவை அதிரடியாகக் கைது செய்தனர்.
நகை, பணத்தைப் பறித்துக்கொண்டு ஒரு குடும்பத்தின் இரண்டு பெண்களின் வாழ்க்கையைச் சீரழித்த இந்த இளைஞரின் செயல் பெங்களூருவில் பெரும் பரபரப்பை ஏற்படுத்தியுள்ளது. தற்போது போலீசார் அவனிடம் தீவிர விசாரணை நடத்தி வருகின்றனர்.