“என் புருஷன் போலீஸ் தெரியுமில்ல?!”.. கால் மேல் காரை ஏற்றிவிட்டு பெண்ணின் ருத்ரதாண்டவம்.. நெட்டிசன்களை கொதிக்க வைத்த வீடியோ..!!

ஹரியானா மாநிலம் குர்கானின் செக்டர் 62 பகுதியில், காரில் சென்ற ஒரு பெண்ணுக்கும் பாதசாரி ஒருவருக்குமிடையே ஏற்பட்ட காரசாரமான வாக்குவாதம் குறித்த காணொளி சமூக வலைதளங்களில் வெளியாகி வைரலாகி வருகிறது. சாலையோரம் நடந்து சென்றுகொண்டிருந்த தனது காலின் மீது அந்தப் பெண் காரை ஏற்றிவிட்டதாகவும், அதற்கு மன்னிப்புக் கேட்பதற்குப் பதிலாக வாக்குவாதத்தில் ஈடுபட்டதாகவும் அந்த நபர் குற்றம் சாட்டியுள்ளார். மேலும், அந்தப் பெண் தனது கணவர் காவல்துறையில் உயர் பதவியில் இருப்பதாகக் கூறி, தன்னை மிரட்ட முயன்றதாகவும் அவர் அந்த வீடியோவில் பதிவு செய்துள்ளார்.

ஆனால், அந்தப் பெண் தன் மீதான குற்றச்சாட்டுகளை மறுத்து, “நீ சாலையின் நடுவில் நடந்து கொண்டிருந்தாய், அதனால்தான் உன் மீது அடிபட்டது” என்று அந்த நபரை நோக்கிக் குற்றம் சாட்டினார். உடனே அந்த நபர், கார் நடுரோட்டில் இல்லாமல் ஓரமாக நிறுத்தப்பட்டிருப்பதைச் சுற்றியுள்ள பகுதிகளைத் தன் கேமரா மூலம் காட்டி, “உங்கள் கார் நடுரோட்டில் நிற்கிறதா? அது பக்கத்தில் நிறுத்தப்பட்டிருப்பதை உங்களால் பார்க்க முடியவில்ையா?” என்று கேள்வி எழுப்பினார். வாக்குவாதத்தின் போது தவறை ஒப்புக்கொள்ளாமல், தன் கணவரின் காவல் துறை செல்வாக்கைப் பயன்படுத்த அந்தப் பெண் முயன்றது இணையத்தில் பெரும் விவாதத்தைக் கிளப்பியுள்ளது.

இந்தக் காணொளி வைரலானதைத் தொடர்ந்து இணையவாசிகள் பலரும் அப்பெண்ணின் திமிரான நடத்தையைக் கடுமையாக விமரிசித்து வருகின்றனர். இந்தியாவில் சட்டங்கள் சாமானியர்களுக்கு மட்டுமே என்றும், செல்வாக்கு மிக்கவர்கள் தங்களது அதிகாரத்தைத் தவறாகப் பயன்படுத்துகிறார்கள் என்றும் பலர் தங்களது ஆதங்கத்தை வெளிப்படுத்தியுள்ளனர். ஒரு சாதாரண மன்னிப்புடன் முடிந்திருக்க வேண்டிய இந்தச் சம்பவம், அந்தப் பெண்ணின் அகங்காரத்தால் தற்போது பெரிய அளவில் வெடித்துள்ள நிலையில், சாலைப் பாதுகாப்பு, பாதசாரிகளின் உரிமைகள் மற்றும் பொதுவெளியில் அதிகாரத்தைத் தவறாகப் பயன்படுத்துவது குறித்த விவாதங்கள் மீண்டும் தீவிரமடைந்துள்ளன.