“அவ்வளவு தான் சோலி முடிஞ்சது”… அதிமுக காலி?…. அடுத்தடுத்து பெட்டியை கட்டும் 7 மாஸ் முன்னாள் அமைச்சர்கள்… விஜய் போட்ட மெகா பிளான்… இபிஎஸ்ஸுக்கு விழுந்த மரண அடி…!

தமிழக அரசியல் வரலாற்றில் எப்போதும் இல்லாத வகையில் தற்போதைய அரசியல் களம் பெரும் அதிரடி திருப்பங்களைச் சந்தித்து வருகிறது. சமீபத்தில் நடந்து முடிந்த 2026 சட்டப்பேரவைத் தேர்தலில் அதிமுக தலைமையிலான கூட்டணி எதிர்பார்த்த வெற்றியைப் பெறத் தவறியதுடன், வெறும் 47 தொகுதிகளில் மட்டுமே வெற்றி பெற்று மூன்றாவது இடத்துக்குத் தள்ளப்பட்டது. இந்தத் தொடர் தேர்தல் தோல்விகள் அதிமுகவிற்குள் பெரும் அதிருப்திக் குரல்களை எழுப்பியுள்ளன. குறிப்பாக, எடப்பாடி பழனிசாமியின் தலைமைச் செயல்பாடுகள் குறித்து கட்சியின் மூத்த நிர்வாகிகள் கேள்வி எழுப்பத் தொடங்கியுள்ள நிலையில், கட்சிக்குள் உள்கட்சி மோதல்கள் வெடிக்கத் தொடங்கியுள்ளன.

இந்த அதிருப்தியின் பின்னணியில் எஸ்.பி. வேலுமணி மற்றும் சி.வி. சண்முகம் ஆகியோரை மையமாகக் கொண்டு ஒரு தனி அணி உருவானதாக அரசியல் வட்டாரங்களில் பேசப்படுகிறது. தமிழக வெற்றிக் கழகம் (தவெக) ஆட்சியமைப்பதற்கான நம்பிக்கை வாக்கெடுப்பின் போது, இந்த அணியைச் சேர்ந்த எம்.எல்.ஏக்கள் அரசுக்கு ஆதரவாக வாக்களித்தது அதிமுகவிற்குள் கடுமையான சர்ச்சையையும் அதிர்வலைகளையும் ஏற்படுத்தியது. இதனால் கோபமடைந்த எடப்பாடி பழனிசாமி, ஒழுங்கு நடவடிக்கை என்ற பெயரில் சிலரின் கட்சிப் பொறுப்புகளைப் பறித்தார். இந்த அதிரடி நடவடிக்கைகள் உள்கட்சி மோதலை மேலும் தீவிரமடையச் செய்து, நிர்வாகிகளை மாற்றுப் பாதையை நோக்கிச் சிந்திக்க வைத்துள்ளது.

ஏற்கனவே மதுராந்தகம் மரகதம் குமரவேல், பெருந்துறை ஜெயக்குமார், தாராபுரம் சத்தியபாமா உள்ளிட்ட முக்கிய நிர்வாகிகள் தவெகவில் இணைந்ததால், சட்டப்பேரவையில் அதிமுகவின் பலம் 47-இல் இருந்து 44 ஆகக் குறைந்தது. இத்தகைய சூழலில், கட்சிக்குள் நிலவி வந்த மோதல்களை முடிவுக்குக் கொண்டு வர எடப்பாடி பழனிசாமி தரப்பில் சமரச பேச்சுவார்த்தைகள் நடத்தப்பட்டு, சிலர் மன்னிப்புக் கடிதம் கொடுத்து மீண்டும் கட்சியில் இணைந்ததாகக் கூறப்பட்டாலும், பதற்றமான சூழல் இன்னும் தணிந்தபாடில்லை. இதற்கிடையே, தவெக தரப்பில் “அதிமுகவின் 90 சதவீத நிர்வாகிகளும் தொண்டர்களும் எங்கள் பக்கம் வருவார்கள்” என்று கூறப்பட்ட கருத்து அரசியல் தளத்தில் பெரும் விவாதப் புயலைக் கிளப்பியுள்ளது.

அதன் தொடர்ச்சியாக, அதிமுகவின் தலைமைக் கழகப் பேச்சாளராக இருந்த சசிரேகா தற்போது அதிகாரப்பூர்வமாக தவெகவில் இணைந்துள்ளார். மேலும், பாப்பிரெட்டிப்பட்டி முன்னாள் எம்.எல்.ஏ கோவிந்தசாமி உள்ளிட்ட 11 முன்னாள் சட்டமன்ற உறுப்பினர்களோடு சுமார் 400 பேர் தவெகவில் இணைய உள்ளதாக முன்னாள் அமைச்சர் உடுமலை ராதாகிருஷ்ணன் தெரிவித்துள்ள தகவல் அதிமுகவிற்குப் பெருத்த முட்டுக்கட்டையாக அமைந்துள்ளது. அதோடு மட்டுமல்லாமல், முன்னாள் அமைச்சர்கள் உடுமலை ராதாகிருஷ்ணன், எம்.எஸ்.எம். ஆனந்தன், கடம்பூர் ராஜு, எம்.சி. சம்பத், சி.வி. சண்முகம், சி. விஜயபாஸ்கர் மற்றும் எம்.ஆர். விஜயபாஸ்கர் ஆகியோர் அடுத்தடுத்து விஜய் முன்னிலையில் தவெகவில் இணைய உள்ளதாக வெளியாகும் தகவல்கள், தமிழக அரசியலில் அதிமுகவின் எதிர்காலத்தை நோக்கிய ஒரு புதிய அதிரடி ஆட்டத்தின் தொடக்கமாகப் பார்க்கப்படுகிறது.