தமிழ் சினிமாவின் போக்கை மாற்றிய ஒரு சில இயக்குனர்களில் பாரதிராஜாவும் ஒருவர். அவர் இயக்கத்தில் வெளியான 16 வயதினிலே திரைப்படம் தமிழ் சினிமாவையே புரட்டி போட்டது. தொடர்ந்து ரத்தமும் சதையுமான கிராமிய மணம் கொண்ட படங்களை கொடுத்து தமிழ் சினிமா ரசிகர்களின் இதயங்களைக் கொள்ளை கொண்டார். 2000 களின் இறுதிவரை அவரது படங்கள் தமிழ் ரசிகர்களை வெகுவாகக் கவர்ந்தன.
80 களில் பாரதிராஜா ஒரு ட்ரண்ட் செட்டராக இருந்த நிலையில் 90 களில் சில சறுக்கல்களை சந்தித்தார். 90 களின் தொடக்கத்தில் அவர் எடுத்த கேப்டன் மகன், நாடோடித்தென்றல் மற்றும் என் உயிர் தோழன் ஆகிய படங்கள் தோல்வி அடைய ஆரம்பித்தன. அதனால் அவர் இனிமேல் அவ்வளவுதான் என்றெல்லாம் பேச்சுகள் எழ ஆரம்பித்தன. அதுமட்டுமில்லாமல் அப்போதுதான் அவர் இளையராஜாவையும் பிரிந்தார்.
அதே நேரத்தில் விநியோகஸ்தராகவும், தயாரிப்பாளராகவும் இருந்த கலைப்புலி தாணு தன்னுடைய முந்தைய படங்களால் கடனில் மூழ்கியிருந்தார். அப்போதுதான் இருவரும் இணைந்து கிழக்குச் சீமையிலே படத்தைத் தொடங்கியுள்ளனர். முதல் முறையாக பாரதிராஜா படத்துக்கு ஏ ஆர் ரஹ்மான் இசையமைத்ததும் இந்த படத்தில்தான்.
இந்த படத்தின் பாடல்கள் எல்லாம் வெளியாகி சூப்பர்ஹிட்டாகி இருந்தன. அப்போது ரஹ்மான் பாடல்களுக்காக இந்தியிலும் ஒரு மார்க்கெட் உருவாகி இருந்தது. அதனால் இந்தி டப்பிங் உரிமையை வாங்க 20 லட்சம் ரூபாய் முன்பணமாகக் கொடுத்துள்ளார் ஒரு தயாரிப்பாளர்.
அதை வாங்கி சந்தோஷமாக இருந்துள்ளார் தாணு. இந்த செய்தியைக் கேள்விபட்ட ஏ ஆர் ரஹ்மான் “இந்த படத்துக்காக கிராமிய பாணியில் இசையமைத்துள்ளேன். ஆனல இந்தி ரசிகர்களின் ரசனை வேறு மாதிரி. இந்த பாடல்கள் அங்கு எடுபடாது. அதனால் அந்த பணத்தைத் திருப்பிக் கொடுத்துடுங்க.” என சொன்னார் என தாணு பகிர்ந்துள்ளார். மேலும் பண விஷயத்தில் ரஹ்மான் முக்கியத்துவம் கொடுக்க மாட்டார் எனவும் கூறியுள்ளார்.