நெல்லை மக்களே உஷார்!… “உங்கள் போனுக்கு வந்ததா அபராத மெசேஜ்?… கிளிக் செய்தால் வங்கி கணக்கு காலியாகும்… RTO பெயரில் நடக்கும் நூதனத் திருட்டு… போலீஸ் அதிரடி எச்சரிக்கை.”

திருநெல்வேலி மாவட்டப் பொதுமக்களின் செல்போன்களுக்கு சமீபகாலமாக மர்மமான குறுஞ்செய்திகள் (SMS) அனுப்பி, நூதன முறையில் பண மோசடி செய்யும் கும்பல் குறித்து காவல்துறையினர் எச்சரிக்கை விடுத்துள்ளனர். அந்தச் செய்தியில், “உங்கள் வாகனம் போக்குவரத்து விதிமுறைகளை மீறியுள்ளதால், அதற்கான அபராதத்தை உடனடியாகச் செலுத்த வேண்டும்” என்று குறிப்பிடப்பட்டு, அதன் கீழே ஒரு இணையதள லிங்க் கொடுக்கப்பட்டிருக்கும். இதனைத் தொட்டால் ‘RTO Challan’ என்ற பெயரில் ஒரு போலி செயலி பதிவிறக்கம் ஆகிறது. இது முற்றிலும் மோசடிக்காரர்களால் உருவாக்கப்பட்ட தளம் என்று போலீசார் கண்டறிந்துள்ளனர்.

இந்த மோசடி செயலியை செல்போனில் நிறுவியவுடன், அது பயனர்களின் குறுஞ்செய்திகள், வங்கி கணக்கு விவரங்கள் மற்றும் ரகசியமான ஓ.டி.பி (OTP) எண்களைத் திருடும் வசதி கொண்டது. பொதுமக்கள் தங்களது வாகன அபராதத்தைச் செலுத்துவதாக நினைத்து வங்கித் தகவல்களை உள்ளிடும்போது, அந்தத் தரவுகளைப் பயன்படுத்தி மர்ம நபர்கள் வங்கி கணக்கில் உள்ள மொத்தப் பணத்தையும் திருடி விடுகின்றனர். அரசு தரப்புத் தகவல்கள் ஒருபோதும் தனிப்பட்ட செல்போன் எண்களிலிருந்து வராது என்பதை மக்கள் புரிந்துகொள்ள வேண்டும் என்று நெல்லை போலீசார் அறிவுறுத்தியுள்ளனர்.

போக்குவரத்து அபராதங்களைச் செலுத்துவதற்கு இந்திய அரசால் அங்கீகரிக்கப்பட்ட [echallan.parivahan.gov.in] என்ற ஒரே ஒரு அதிகாரப்பூர்வ தளம் மட்டுமே உள்ளது. இதைத் தவிர வேறு எந்தச் செயலிகளையோ அல்லது வாட்ஸ்அப் வழியாக வரும் சந்தேகத்திற்குரிய லிங்க்குகளையோ நம்பி பணத்தைச் செலுத்த வேண்டாம். குறிப்பாக, தெரியாத நபர்களிடம் இருந்து வரும் எந்த ஒரு ஏ.பி.கே (APK) பைல்களையும் செல்போனில் இன்ஸ்டால் செய்யக் கூடாது என்பதில் பொதுமக்கள் மிகுந்த விழிப்புணர்வுடன் இருக்க வேண்டும் என எச்சரிக்கப்பட்டுள்ளது.

ஒருவேளை யாராவது இது போன்ற சைபர் மோசடி வலைதளங்களில் சிக்கி பணத்தை இழந்தால், தாமதிக்காமல் உடனடியாக 1930 என்ற சைபர் க்ரைம் உதவி எண்ணை அழைத்து புகார் அளிக்க வேண்டும். பாதிக்கப்பட்ட 24 மணி நேரத்திற்குள் (Golden Hour) புகார் அளித்தால் மட்டுமே, வங்கி கணக்கிலிருந்து திருடப்பட்ட பணத்தை மீட்பதற்கான வாய்ப்புகள் அதிகம் உள்ளன. அறிமுகமில்லாத லிங்குகளைத் தவிர்ப்பதன் மூலம் இத்தகைய நிதி இழப்புகளை எளிதாகத் தடுக்க முடியும் என காவல்துறையினர் தெரிவித்துள்ளனர்.