சர்வதேச நாணய நிதியம் (IMF) வெளியிட்டுள்ள சமீபத்திய உலகப் பொருளாதாரக் கண்ணோட்ட அறிக்கையின்படி, உலகின் மிகப்பெரிய பொருளாதார நாடுகளின் தரவரிசையில் இந்தியா ஒரு படி பின்வாங்கி ஆறாவது இடத்தைப் பிடித்துள்ளது. இந்தத் தரவரிசை மொத்த உள்நாட்டு உற்பத்தியின் (GDP) அடிப்படையில் கணக்கிடப்பட்டுள்ளது. இதில் 30 டிரில்லியன் டாலர் மதிப்புடன் அமெரிக்கா முதலிடத்திலும், சீனா இரண்டாவது இடத்திலும் உள்ளன. ஜெர்மனி மற்றும் ஜப்பான் ஆகிய நாடுகள் அடுத்தடுத்த இடங்களைப் பெற்றுள்ள நிலையில், இங்கிலாந்து இந்தியாவை முந்தி ஐந்தாவது இடத்தைப் பிடித்துள்ளது.
கடந்த 2021-ம் ஆண்டு முதல் உலகின் ஐந்தாவது பெரிய பொருளாதார நாடாகத் திகழ்ந்த இந்தியா, தற்போது ஆறாவது இடத்திற்குச் செல்ல இந்திய ரூபாயின் மதிப்பு வீழ்ச்சியே முக்கியக் காரணமாகக் கூறப்படுகிறது. உலகளாவிய GDP தரவரிசை அமெரிக்க டாலரின் மதிப்பை அடிப்படையாகக் கொண்டது. கடந்த ஓராண்டில் டாலருக்கு நிகரான ரூபாயின் மதிப்பு 80-லிருந்து 90-க்கும் மேலாகச் சரிந்துள்ளது. இந்தியா, ஜப்பான் மற்றும் இங்கிலாந்து ஆகிய நாடுகளின் GDP மதிப்புகள் 4 முதல் 5 டிரில்லியன் டாலர் என்ற மிக நெருக்கமான எல்லைக்குள் இருப்பதால், நாணய மதிப்பில் ஏற்படும் சிறு மாற்றமும் தரவரிசையில் பெரிய தாக்கத்தை ஏற்படுத்துகிறது.
இந்தியா தனது கச்சா எண்ணெய் தேவையில் சுமார் 90% இறக்குமதியை நம்பியே உள்ளது. தற்போதைய உலகளாவிய போர்ச் சூழல்கள் காரணமாக எண்ணெய் விலை உயரும்போது, இந்தியா அதிகளவிலான டாலர்களைச் செலவிட வேண்டிய கட்டாயத்திற்குத் தள்ளப்படுகிறது. இது அந்நியச் செலாவணி கையிருப்பை பாதிப்பதோடு, ரூபாயின் மதிப்பை நேரடியாகக் குறைக்கிறது. இத்தகைய பொருளாதாரச் சூழல் இறக்குமதிச் செலவுகளை அதிகரித்து, நாட்டின் ஒட்டுமொத்த GDP வளர்ச்சியை டாலர் மதிப்பில் கணக்கிடும்போது பின்தங்கச் செய்கிறது.
மேலும், உலகளாவிய பொருளாதார நிச்சயமற்ற தன்மையால் முதலீட்டாளர்கள் இந்தியப் பங்குச்சந்தைகளில் இருந்து தங்கள் நிதியைத் திரும்பப் பெற்று, பாதுகாப்பான முதலீடாகக் கருதப்படும் அமெரிக்க டாலருக்கு மாறுகின்றனர். அமெரிக்காவில் நிலவும் அதிக வட்டி விகிதங்கள் டாலரை மற்ற நாட்டு நாணயங்களை விட வலிமையாக்கியுள்ளன. இத்தகைய வெளிப்புறக் காரணிகளால் ரூபாயின் மதிப்பு சரிந்து, இந்தியா தற்காலிகமாகத் தரவரிசையில் பின்வாங்கியிருந்தாலும், உள்நாட்டு உற்பத்தி மற்றும் பொருளாதாரக் கட்டமைப்புகள் தொடர்ந்து வளர்ச்சிப் பாதையிலேயே பயணித்து வருகின்றன.