தலைமுடியைப் பிடித்து இழுத்து காலால் மிதித்து… பட்டப்பகலில் பெண் மீது கொடூரத் தாக்குதல் – பதறவைக்கும் சிசிடிவி காட்சிகள்… கொந்தளிக்கும் நெட்டிசன்கள்..!!

மும்பையின் மலாடு மேற்கு பகுதியில் உள்ள ஒரு மக்கள் நடமாட்டம் மிகுந்த சாலையில் இந்த அதிர்ச்சிகரமான சம்பவம் நடந்துள்ளது. சாலையில் நடந்து சென்று கொண்டிருந்த ஒரு பெண்ணை, மர்ம நபர் ஒருவர் வழிமறித்து சரமாரியாகத் தாக்கியுள்ளார். அந்த நபர் பெண்ணின் தலைமுடியைப் பிடித்து இழுத்து, தரையில் தள்ளி காலால் மிதிப்பதும், முகத்தில் ஓங்கி அறைவதும் அங்கிருந்த சிசிடிவி கேமராவில் பதிவாகியுள்ளது.

இந்தத் தாக்குதல் பட்டப்பகலில் பொதுமக்கள் முன்னிலையிலேயே அரங்கேறியுள்ளது. அருகில் இருந்தவர்கள் தடுத்து நிறுத்த முயன்றும், அந்த நபர் ஆவேசமாகத் தாக்குதலைத் தொடர்ந்துள்ளார். இந்தச் சம்பவத்தின் வீடியோ சமூக வலைதளங்களில் வைரலாகி பெரும் கொந்தளிப்பை ஏற்படுத்தியுள்ளது. மும்பை போன்ற ஒரு பெருநகரத்தில், மக்கள் நடமாடும் இடத்திலேயே பெண்ணுக்குப் பாதுகாப்பு இல்லாத சூழல் நிலவுவதாக இணையவாசிகள் பலரும் தங்களது ஆதங்கத்தை வெளிப்படுத்தி வருகின்றனர்.

வீடியோ ஆதாரங்களின் அடிப்படையில் மும்பை காவல்துறை வழக்குப் பதிவு செய்து விசாரணையைத் தொடங்கியுள்ளது. முதற்கட்ட விசாரணையில், தாக்குதல் நடத்திய நபருக்கும் அந்தப் பெண்ணுக்கும் இடையே ஏற்கனவே அறிமுகம் இருந்திருக்கலாம் அல்லது ஏதேனும் தனிப்பட்ட முன்விரோதம் காரணமாக இந்தத் தாக்குதல் நடந்திருக்கலாம் என்று சந்தேகிக்கப்படுகிறது. குற்றவாளியைக் கைது செய்து கடுமையான நடவடிக்கை எடுக்க வேண்டும் என்று சமூக ஆர்வலர்கள் கோரிக்கை விடுத்துள்ளனர்.