ஓட்காவுடன் நாவல் பழ ‘கோலா ஐஸ்’.. சண்டிகரில் செம்ம பிளான் போட்ட மதுக்கடை ஓனர்.. கடைசியில் நடந்த ட்விஸ்ட்.. வைரல் வீடியோ

சண்டிகரின் ஆடம்பரமான மற்றும் முக்கியப் பிரமுகர்கள் அடிக்கடி வந்து செல்லும் செக்டர்-9 சந்தையில் உள்ள ‘லிகர் வேர்ல்ட்’ என்ற மதுபானக் கடைக்கு வெளியே, புதிதாக அறிமுகப்படுத்தப்பட்ட ஓட்கா பிராண்ட் ஒன்றை விளம்பரப்படுத்தும் விதமாகப் பொதுமக்களுக்குப் பகிரங்கமாக இலவசமாக மதுபானம் வழங்கப்பட்டுள்ளது. ‘ஸ்மிர்னாஃப் மின்டி ஜாமூன்’ சுவையுடைய ஓட்கா, ஐஸ் ரோல்களில் (பராஃப் கா கோலா) கலக்கப்பட்டு மக்களுக்கு வெளிப்படையாகப் பரிமாறப்பட்ட இந்தக் காணொளி சமூக ஊடகங்களில் காட்டுத்தீயாகப் பரவி வைரலானது. இந்த விளம்பர நடவடிக்கையைக் கண்டு அங்கு ஒரு பெரிய கூட்டமே கூடியது காணொளியில் வெளிச்சத்திற்கு வந்ததை அடுத்து, இது பெரும் சர்ச்சையை ஏற்படுத்தி சட்ட நடவடிக்கையைத் தூண்டியுள்ளது.

இச்சம்பவத்தைத் தொடர்ந்து செக்டர்-3 போலீசார் முதல் தகவல் அறிக்கை (FIR) பதிவு செய்து, கடை உரிமையாளரான ராஜேஷ் சச்தேவாவை அதிரடியாகக் கைது செய்துள்ளனர். இந்த விளம்பரப் பணியில் ஒரு தனியார் நிறுவனத்தின் ஒப்பந்தப் பணியாளர் ஈடுபட்டிருந்ததாகக் காவல் துறை விசாரணையில் தெரியவந்துள்ளது. இந்த விவகாரத்தில் வேறு யார் யாருக்குத் தொடர்புள்ளது என்பது குறித்து போலீசார் தொடர்ந்து தீவிர விசாரணை நடத்தி வரும் வேளையில், சம்பந்தப்பட்ட முக்கிய மதுபான ஒப்பந்ததாரர் மீது இதுவரை ஏன் எந்த நடவடிக்கையும் எடுக்கப்படவில்லை என்ற கேள்விகளும் வலுத்து வருகின்றன.