ஒரே ஒரு வாத்து, ஓவர் நைட்டில் லட்சாதிபதி…. வாத்தை வெட்டியவருக்குக் காத்திருந்த ‘கோல்டன்’ சர்ப்ரைஸ்… சீனாவில் நடந்த வினோத சம்பவம்…!!!

மத்திய சீனாவில் உள்ள ஹுனான் மாகாணத்தில் வசிக்கும் லிவு என்ற விவசாயி, தனது வளர்ப்பு வாத்து ஒன்றை உணவிற்காக வெட்டியபோது அதன் வயிற்றில் விலைமதிப்பற்ற தங்கத் துகள்கள் இருப்பதைக்கண்டு அதிர்ச்சியும் மகிழ்ச்சியும் அடைந்தார். சுமார் 10 கிராம் எடையுள்ள அந்த தங்கத் துகள்களின் மதிப்பு இந்திய ரூபாயில் சுமார் 1.65 லட்சம் இருக்கும் என்று கணக்கிடப்பட்டுள்ளது.

மேலும் அந்த வாத்து அருகிலுள்ள ஆற்றுப் படுகையில் மேய்ந்தபோது, மண்ணுடன் சேர்ந்து தங்கத் துகள்களையும் விழுங்கியிருக்கலாம் என்று கருதப்படுகிறது. அந்தப் பகுதி 1970-களில் தங்கப் படிமங்களுக்குப் புகழ்பெற்ற இடமாக இருந்ததால், இது போன்ற நிகழ்வுகள் அங்கு அவ்வப்போது நடப்பதாக உள்ளூர்வாசிகள் தெரிவிக்கின்றனர்.

இருப்பினும், இந்த எதிர்பாராத அதிர்ஷ்டத்தில் ஒரு சட்டச் சிக்கலும் நிலவுகிறது. சீனச் சட்டப்படி, நிலத்திற்கு அடியில் கண்டெடுக்கப்படும் கனிம வளங்கள் அனைத்தும் அரசுக்கே சொந்தம் என்பதால், இந்தத் தங்கம் விவசாயிக்குச் சேருமா அல்லது அரசிடம் ஒப்படைக்கப்படுமா என்பதில் இழுபறி நீடிக்கிறது.

இது குறித்து அதிகாரிகள் தீவிர விசாரணை நடத்தி வரும் நிலையில், வாத்தின் வயிற்றில் தங்கம் கிடைத்த செய்தி சமூக வலைதளங்களில் பெரும் விவாதத்தையும் வியப்பையும் ஏற்படுத்தியுள்ளது. ஒரு சாதாரண வாத்து மூலம் ஒருவருக்கு இவ்வளவு பெரிய அதிர்ஷ்டம் கிடைத்திருப்பது அந்த கிராமம் முழுவதையும் உற்சாகத்தில் ஆழ்த்தியுள்ளது.