கலிஃபோர்னியாவைச் சேர்ந்த டேமன் ஜூம்பிரேகல் என்ற வெளிநாட்டுச் சுற்றுலாப் பயணி, டெல்லி இந்திரா காந்தி சர்வதேச விமான நிலையத்தின் குடிவரவு பகுதியில் எடுக்கப்பட்ட வீடியோவை எக்ஸ் தளத்தில் பகிர்ந்து எதிர்மறையான கருத்துகளைப் பதிவிட்டிருந்தார். “இந்தியாவிற்கு வரவேற்பு? இப்படித்தான் ஒருவர் டெல்லி வழியே இந்தியாவிற்குள் நுழைய வேண்டுமா?” எனக் கூறி டெல்லி விமான நிலையத்தின் சேவைகள் மற்றும் சூழல் குறித்து விமர்சித்திருந்தார்.
இந்த வீடியோ சமூக வலைத்தளங்களில் வைரலானதைத் தொடர்ந்து, இந்திய மற்றும் உலகளவிலான இணையவாசிகள் அவருக்குக் கடும் எதிர்ப்புத் தெரிவித்தனர். குறிப்பாக, “வெறுப்பைப் பரப்புவதை நிறுத்துங்கள் சகோதரரே, நீங்கள் எப்போதாவது ஆஸ்திரேலிய விமான நிலையங்களுக்குச் சென்று பார்த்ததுண்டா?” என்று பயனர் ஒருவர் வினவினார். மேலைநாடுகளிலும் ஆஸ்திரேலியா போன்ற வளர்ந்த நாடுகளின் விமான நிலையங்களிலும்கூட நீண்ட வரிசைகளும் இதே போன்ற தாமதங்களும் சாதாரணமாக நடப்பவைதான் என்பதைப் பலரும் சுட்டிக்காட்டினர்.
உலகின் முன்னணி மற்றும் பிஸியான விமான நிலையங்களில் ஒன்றான டெல்லி விமான நிலையத்தில் பாதுகாப்பு மற்றும் சரிபார்ப்பு நடைமுறைகளுக்காகச் சில கட்டுப்பாடுகள் பின்பற்றப்படுவதை உணராமல், அதை மட்டும் குறை கூறுவது சரியல்ல எனப் பலரும் கருத்துத் தெரிவித்தனர். மற்ற நாடுகளின் விமான நிலையங்களிலும் பயணிகள் சந்திக்கும் சிரமங்களை ஒப்பிட்டுப் பேசிய இணையவாசிகள், இந்திய விமான நிலையங்களின் உள்கட்டமைப்பு மற்றும் வசதிகள் தொடர்ந்து மேம்பட்டு வருவதையும் சுட்டிக்காட்டி அவருக்குப் பதிலளித்தனர்.