“போர் முடிந்தது.. சர்வதேச சந்தையில் கச்சா எண்ணெய் விலை குறையுமா…? உலகப் பொருளாதாரத்தில் அதிரடி மாற்றம்…!!”

மத்திய கிழக்கில் நிலவி வந்த பதற்றத்தைத் தணிக்கும் வகையில் அமெரிக்கா – ஈரான் இடையே அமைதி ஒப்பந்தம் உருவாகும் சூழல் ஏற்பட்டுள்ளது. இதன் காரணமாக உலகளாவிய சந்தையில் கச்சா எண்ணெய் மற்றும் இயற்கை எரிவாயு விலைகள் இன்று கடுமையாகச் சரிந்துள்ளன. குறிப்பாக, அமெரிக்காவின் கச்சா எண்ணெய் 5.44% குறைந்து , பிரெண்ட் கச்சா எண்ணெய் 4.97% வீழ்ச்சியடைந்து, முர்பான் கச்சா எண்ணெய் 6.88% சரிந்து வர்த்தகமாகின்றன. இயற்கை எரிவாயு விலையும் 2.56% வீழ்ச்சியடைந்து ஆக உள்ளது. ஹார்முஸ் ஜலசந்தி மீண்டும் திறக்கப்படும் என்ற எதிர்பார்ப்பால் எண்ணெய் விநியோகத் தடைகள் குறையும் என்ற நம்பிக்கை சந்தையில் உருவாகியுள்ளது.

இருப்பினும், இந்த அமைதி ஒப்பந்தம் உடனடியாக எண்ணெய் மற்றும் எரிவாயு வர்த்தகத்தைப் போருக்கு முந்தைய நிலைக்குக் கொண்டு வராது என்று எரிசக்தி நிபுணர்கள் எச்சரிக்கின்றனர். கடந்த மூன்றரை மாதங்களாக ஹார்முஸ் ஜலசந்தி மூடப்பட்டிருந்ததால், தினசரி 1 கோடி பேரல்களுக்கும் அதிகமான எண்ணெய் உற்பத்தி நிறுத்தப்பட்டுள்ளது. சவுதி அரேபியா மற்றும் ஐக்கிய அரபு எமிரேட்ஸ் போன்ற நாடுகள் உற்பத்தியை விரைவாக மீட்டெடுக்க முடியும் என்றாலும், ஈராக் போன்ற நாடுகள் அதிக அளவில் உற்பத்தியைக் குறைத்திருந்ததாலும், பஸ்ரா துறைமுகத்தை நம்பியிருப்பதாலும் அதன் முழுமையான உற்பத்தி மீட்சிக்கு ஒரு வருடம் வரை ஆகலாம் எனக் கணிக்கப்பட்டுள்ளது.

வூட்ஸ் மேக்கன்சி நிறுவனத்தின் கணிப்புப்படி, பாதிக்கப்பட்ட எண்ணெய் வயல்கள் மூன்று மாதங்களில் 70 சதவீத உற்பத்தியையும், ஆறு மாதங்களில் 90 சதவீதத்தையும் எட்டக்கூடும்; ஆனால் இறுதி 10 லட்சம் பீப்பாய்களை மீட்டெடுக்கக் கூடுதல் காலம் எடுக்கும். மேலும், ஜலசந்தி திறக்கப்பட்டாலும் அங்கு காத்திருக்கும் கப்பல்கள், காப்பீட்டுச் சிக்கல்கள், பாதுகாப்பு நடைமுறைகள் மற்றும் துறைமுக நெரிசல் போன்ற காரணங்களால் வர்த்தகம் உடனடியாக வேகமெடுக்காது. இந்த உற்பத்தி மீட்சிக்கு மாதக்கணக்கில் நேரமாகும் என்பதால், இந்தியாவில் பெட்ரோல், டீசல் விலை உடனடியாகக் குறையாது என்றும், எரிவாயு தட்டுப்பாடுப் பிரச்சினையும் உடனே தீராது என்றும் நிபுணர்கள் தெளிவுபடுத்தியுள்ளனர்.