பகீர்.. கள்ளக்காதலுக்கு இடையூறாக இருந்த 7 வயது குழந்தை… சாக்லேட் கொடுத்து கடத்திக் கொன்ற வங்கி மேலாளர்.. உ.பி- யில் அதிர்ச்சி…!!

உத்தரப் பிரதேசத்தின் மீரட் மாவட்டத்தில், அங்கத்வீர் என்ற 7 வயது சிறுவன் அவனது தாயின் காதலனான அர்பித் பராஷர் என்பவரால் கொடூரமாகக் கொலை செய்யப்பட்டுள்ளான். சிறுவனின் தந்தை குர்சேவக் பிழைப்புக்காகச் சவுதி அரேபியா சென்றுள்ள நிலையில், தாயார் குர்பிரீத் கவுருக்கும், எச்.டி.எஃப்.சி வங்கி பகுதி மேலாளரான அர்பித்துக்கும் இடையே கள்ளக்காதல் ஏற்பட்டுள்ளது. இவர்களின் நெருக்கமான நிலையைச் சிறுவன் அங்கத்வீர் பார்த்துவிட்டதால், சமூக அவப்பெயருக்கு அஞ்சிய அர்பித், சிறுவனுக்குச் சாக்லேட் தருவதாகக் கூறி காரில் கடத்திச் சென்று கழுத்தை அறுத்துக் கொலை செய்துள்ளார். பஞ்சாபில் உள்ள பாட்டி வீட்டில் படித்து வந்த அச்சிறுவன், சம்பவம் நடப்பதற்கு ஒரு வாரத்திற்கு முன்புதான் மீரட்டிற்கு வந்திருந்தான் என்பது குறிப்பிடத்தக்கது.

சிறுவன் காணாமல் போனது குறித்து குடும்பத்தினர் அளித்த புகாரின் பேரில், காவல்துறையினர் சிசிடிவி காட்சிகளை ஆய்வு செய்து விசாரணையைத் தொடங்கினர். அதில் சிறுவன் காரில் அழைத்துச் செல்லப்படுவது உறுதியானது. குற்றம் சாட்டப்பட்ட அர்பித் ஆரம்பத்தில் போலீசாரைத் திசைதிருப்ப முயன்றாலும், தீவிர விசாரணைக்குப் பிறகு தனது குற்றத்தை ஒப்புக்கொண்டார். அவர் காட்டிய இடமான பத்ரகாலி வனப்பகுதியின் புதர்களிலிருந்து சிறுவனின் உடல் மீட்கப்பட்டது. கடத்தல் புகார் அளிக்கப்பட்ட 24 மணி நேரத்திற்குள் குற்றவாளியைக் கைது செய்த போலீசார், கொலைக்குப் பயன்படுத்திய கத்தி மற்றும் வேகன்-ஆர் காரையும் பறிமுதல் செய்துள்ளனர்.

முன்பு குர்பிரீத் பள்ளி ஆசிரியையாகப் பணியாற்றியபோது, தினமும் பேருந்தில் பயணம் செய்ததால் திருமணமான அர்பித்துக்கும் அவருக்கும் பழக்கம் ஏற்பட்டு அது காதலாக மாறியுள்ளது. தற்போது கொலைக் குற்றவாளியான அர்பித் கைது செய்யப்பட்டு மேல் விசாரணை நடந்து வரும் வேளையில், இந்தக் கொடூரக் கொலையில் தாய்க்கும் ஏதேனும் தொடர்பு உள்ளதா என்ற கோணத்திலும் போலீசார் தீவிரமாக விசாரித்து வருகின்றனர். இதுவரை தாய் மீது எந்தக் குற்றச்சாட்டும் உறுதி செய்யப்படவில்லை என்றாலும், அவரது பங்கு குறித்து அதிகாரிகள் தொடர்ந்து ஆய்வு செய்து வருகின்றனர்.