அதிமுக மற்றும் பாஜக கூட்டணியில் விரைவில் டிடிவி தினகரன் மற்றும் ஓபிஎஸ் உள்ளிட்டோர் இணைய உள்ளதாக தகவல் வெளியாகி வருகின்றது. தேர்தல் கூட்டணி தொடர்பாக பல்வேறு யூகங்கள் நிலவிவரும் சூழலில் இந்த தகவல் பற்றி டிடிவி தினகரன் வெளிப்படையாக பேசியுள்ளார். அதாவது, ஆண்டிபட்டி தொகுதியில் அமமுக வேட்பாளர் தான் கண்டிப்பாக போட்டியிடுவார். நாங்கள் எந்த கூட்டணியில் இருந்தாலும் இந்த தொகுதியை விட்டுக் கொடுக்க போவதில்லை. எங்களுக்கு எந்தக் கூட்டணி வேண்டும் என்பதை நாங்களே முடிவு செய்வோம். சமீப காலமாகவே அதிமுக கூட்டணியில் நாங்கள் இணைய போவதாகவும் ஆறு தொகுதிகள் ஒதுக்கப்பட்டுள்ளதாகவும் செய்திகள் பரவி வருகிறது.
அது முற்றிலும் தவறானது. கூட்டணியே இன்னும் அமையாத போது தொகுதிகள் ஒதுக்கீடு என்பது வெறும் வதந்தி தான் என்று தெளிவுபடுத்தி உள்ளார். மேலும் தமிழக அரசியலில் தவிர்க்க முடியாத சக்தியாக அம்மா மக்கள் முன்னேற்றக் கழகம் விளங்குவதாக குறிப்பிட்ட தினகரன் கட்சியின் கட்டமைப்பு மிகவும் பலமாக உள்ளதாகவும் தெரிவித்துள்ளார். NDA கூட்டணியில் இருந்து கடந்த செப்டம்பர் மாதம் டிடிவி தினகரன் விலகிய நிலையில் தற்போது வரை எந்த கூட்டணியில் இணைய போகிறார் என்ற அறிவிப்பை வெளியிடாமல் உள்ளது தமிழக அரசியலில் புதிய பரபரப்பை கிளப்பியுள்ளது.