தமிழ்நாட்டில் தற்போது நடைபெற்று வரும் சட்டமன்ற கூட்டத்தொடரின் மானியக்கோரிக்கை விவாதத்தின் போது, வீட்டுவசதி மற்றும் நகர்ப்புற வளர்ச்சித்துறை அமைச்சர் ராஜ்குமார் பொதுமக்கள் மற்றும் கட்டட உரிமையாளர்களுக்குப் பயனளிக்கும் வகையில் பல்வேறு புதிய அறிவிப்புகளை வெளியிட்டார். குறிப்பாக, முதலமைச்சர் விஜய்யின் பெரம்பூர் தொகுதியில் ரூ. 111.08 கோடியில் 462 அடுக்குமாடிக் குடியிருப்புகள் கட்டப்படுவதுடன், சுயநிதித் திட்டத்தின் கீழ் ரூ. 914 கோடியில் 842 குடியிருப்புகள் மற்றும் பொருளாதாரத்தில் நலிவுற்ற குடும்பங்களுக்காக ரூ. 987.42 கோடியில் 15,000 தனி வீடுகள் கட்டும் திட்டங்கள் அறிவிக்கப்பட்டுள்ளன. மேலும், சென்னை மற்றும் இதர மாவட்டங்களில் உள்ள 41,664 பழைய குடியிருப்புகளைப் புனரமைக்க ரூ. 96.63 கோடியும், கோயம்பேடு மற்றும் சாத்தாங்காடு வளாக சாலைகளை மேம்படுத்த ரூ. 20 கோடியும் ஒதுக்கீடு செய்யப்பட்டுள்ளது.
கட்டட அனுமதி பெறுவதற்கான நடைமுறைகளை எளிமைப்படுத்தும் நோக்கில் பல முக்கிய சீர்திருத்தங்கள் அறிமுகப்படுத்தப்பட்டுள்ளன. இதன்படி, சுய சான்றிதழ் மூலம் கட்டட அனுமதி பெறும் பரப்பளவு குடியிருப்பு கட்டிடங்களுக்கு 3,500 சதுர அடியில் இருந்து 5,000 சதுர அடியாக உயர்த்தப்பட்டுள்ளதுடன், 1,500 சதுர அடி வரையிலான சிறிய வணிகக் கட்டிடங்களுக்கும் இந்த சுய சான்றளிப்பு முறை விரிவுபடுத்தப்பட்டுள்ளது. மேலும், பொதுமக்கள் உள்ளாட்சி அலுவலகங்களுக்குச் செல்லாமல் எளிதில் அனுமதி பெறும் வகையில், 8,070 சதுர அடி வரையிலான குடியிருப்பு கட்டிடங்கள் மற்றும் 3,230 சதுர அடி வரையிலான வணிக கட்டிடங்களுக்கு அங்கீகரிக்கப்பட்ட மூன்றாம் தரப்பு சான்றளிப்பு முறை முதல் முறையாக அறிமுகப்படுத்தப்பட்டுள்ளது.
மக்களின் நீண்டகாலத் தேவைகளைக் கருத்தில் கொண்டு நிலுவையில் உள்ள அபராத வட்டிகளைத் தள்ளுபடி செய்ய சுமார் 7,000 ஒதுக்கீட்டுதாரர்களுக்குச் சிறப்புச் சலுகை அறிவிக்கப்பட்டுள்ளது. மேலும், சிறிய குடியிருப்பு மற்றும் வணிகக் கட்டிடங்களுக்கான உள்ளாட்சி அமைப்புகளின் அனுமதி வரம்புகள் உயர்த்தப்பட்டுள்ளதுடன், நன்செய் நிலங்களை வேளாண்மை அல்லாத பயன்பாட்டிற்கு மாற்றும் நடைமுறை எளிமையாக்கப்பட்டுள்ளது. டிடிஆர் பரிவர்த்தனைக்காக ரூ. 1 கோடியில் மின்னனு இணையவழி தளம் உருவாக்கப்படுவது உள்ளிட்ட பல்வேறு ஆக்கப்பூர்வமான 20 அறிவிப்புகள் இந்த கூட்டத்தொடரில் வெளியிடப்பட்டுள்ளன