யாரும் எதிர்பார்க்காத ட்விஸ்ட்…. அதிமுகவின் 36 எம்.எல்.ஏக்கள் கையில் வைத்திருக்கும் அந்த ‘கடிதம்’… லீக்கான ரகசியத் தகவல்…!

2026 தமிழக சட்டசபை தேர்தலில் அதிமுக சந்தித்த படுதோல்வி, அக்கட்சிக்குள் நீண்டகாலமாக புகைந்து கொண்டிருந்த அதிருப்தியை தற்போது எரிமலையாக வெடிக்கச் செய்துள்ளது. எடப்பாடி பழனிசாமி தலைமையில் தொடர்ச்சியாகச் சந்தித்த 11-வது தோல்வி இது என்பதால், கட்சி நிர்வாகிகள் மற்றும் தொண்டர்கள் மத்தியில் தலைமை மாற்றத்திற்கான கோரிக்கை வலுத்துள்ளது. குறிப்பாக, தவெக-வுடன் கூட்டணி அமைக்கத் தவறியதே இந்த சரிவுக்கு முக்கியக் காரணம் என்ற விமர்சனம் எழுந்துள்ள நிலையில், எடப்பாடிக்கு எதிராக மூத்த தலைவர்கள் போர்க்கொடி தூக்கியுள்ளனர்.

அதிமுகவின் முக்கியத் தூண்களாகக் கருதப்படும் எஸ்.பி. வேலுமணி மற்றும் சி.வி. சண்முகம் ஆகியோர் தலைமையில் தனியாக ஆலோசனை கூட்டம் நடத்தப்பட்டிருப்பது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. இந்த ரகசியக் கூட்டத்தில் சுமார் 36 எம்.எல்.ஏக்கள் பங்கேற்றதாகக் கூறப்படுகிறது. எடப்பாடி பழனிசாமியை பொதுச்செயலாளர் பதவியில் இருந்து நீக்கிவிட்டு, புதிய தலைமைத்துவத்தை உருவாக்க வேண்டும் என்பதே இவர்களின் பிரதான நோக்கமாக இருக்கிறது. இதற்காக விரைவில் பொதுக்குழுவைக் கூட்டி எஸ்.பி. வேலுமணியைப் பொதுச்செயலாளராகவும், சி.வி. சண்முகத்தைச் சட்டமன்றக் குழுத் தலைவராகவும் அறிவிக்கத் திட்டமிட்டுள்ளதாகத் தெரிகிறது.

மிகவும் பரபரப்பான திருப்பமாக, சி.வி. சண்முகம் தலைமையிலான இந்த 36 எம்.எல்.ஏக்களும் நடிகர் விஜய்யின் தமிழக வெற்றிக் கழகத்திற்கு (தவெக) ஆதரவு அளிக்க முடிவெடுத்துள்ளதாகத் தகவல்கள் கசிந்துள்ளன. இதற்கான விருப்பக் கடிதத்தையும் அவர்கள் ஏற்கனவே வழங்கியுள்ளதாகக் கூறப்படுகிறது. தமிழக அரசியலில் இதுவரைக் கண்டிராத வகையில், பிரதான எதிர்க்கட்சி அந்தஸ்தை இழந்த நிலையில் உள்ள அதிமுகவின் ஒரு பிரிவு, புதிதாக ஆட்சி அமைத்துள்ள தவெக-வை நோக்கி நகர்வது எடப்பாடி பழனிசாமிக்கு விழுந்த பலத்த அடியாகப் பார்க்கப்படுகிறது.

தற்போது தவெக ஆட்சி அமைத்துள்ள சூழலில், விசிக மற்றும் கம்யூனிஸ்ட் கட்சிகள் வெளிப்படையான ஆதரவை வழங்கினாலும், சட்டசபையில் பெரும்பான்மையை நிரூபிக்க வேண்டிய கட்டாயம் விஜய்க்கு உள்ளது. வரும் 13-ம் தேதிக்குள் பெரும்பான்மையை நிரூபிக்க வேண்டிய நிலையில், அதிமுக எம்.எல்.ஏக்களின் இந்த ஆதரவு விஜய்க்குப் பெரும் பலமாக அமையும். “இன்று இரவுக்குள் எது வேண்டுமானாலும் நடக்கலாம்” என்கிற சூழல் நிலவுவதால், அதிமுகவின் எதிர்காலமும் தமிழக அரசியலின் போக்கும் இன்று வெளியாகப்போகும் அதிகாரப்பூர்வ அறிவிப்பில் அடங்கியுள்ளது.