“அரசு கேபிளில் 3 முக்கிய சேனல்கள் கட்..? அண்ணாமலை, கனிமொழி கண்டனம்… பின்னணியில் நடந்தது என்ன..?”

தமிழக அரசு கேபிளில் இருந்து பாலிமர், நியூஸ் தமிழ் 24X7 மற்றும் தமிழ் ஜனம் ஆகிய சேனல்கள் நீக்கப்பட்டதாகக் கூறப்பட்ட தகவல் பெரும் பரபரப்பை ஏற்படுத்தியது. இதற்கு எடப்பாடி பழனிசாமி, அண்ணாமலை மற்றும் கனிமொழி உள்ளிட்ட அரசியல் தலைவர்கள் கடும் கண்டனம் தெரிவித்தனர். குறிப்பாக, அரசின் நிர்வாகத் திறமையின்மையைச் சுட்டிக்காட்டுவதால் இந்த ஊடகங்கள் பழிவாங்கப்படுவதாக அண்ணாமலையும், இது பத்திரிகை சுதந்திரத்திற்கு எதிரானது என்று கனிமொழியும் தங்களது எக்ஸ் தளத்தில் பதிவிட்டு, இந்தச் சேனல்களை மீண்டும் ஒளிபரப்ப வலியுறுத்தினர்.

இருப்பினும், இந்தத் தகவல்கள் முற்றிலும் தவறானவை என்று தமிழ்நாடு தகவல் சரிபார்ப்பகம் மற்றும் கல்வித்துறை அமைச்சர் ராஜ்மோகன் ஆகியோர் விளக்கம் அளித்துள்ளனர். அரசு கேபிள் நிறுவனம் செட்டாப் பாக்ஸ் நிறுவனத்திற்கு நிலுவைத் தொகை வைத்திருப்பதாகக் கூறப்படும் காரணத்தில் உண்மையில்லை என்றும், இது ஒரு திட்டமிட்ட தவறான பரப்புரை என்றும் அவர்கள் தெளிவுபடுத்தியுள்ளனர். நிர்வாக ரீதியாகவோ அல்லது உள்நோக்கத்துடனோ எந்தச் சேனல்களும் நீக்கப்படவில்லை என்பதை அரசுத் தரப்பு உறுதிப்படுத்தியுள்ளது.

உண்மையில், தொழில்நுட்பக் கோளாறுகள் காரணமாகவே சில செட் ஆஃப் பாக்ஸ்களில் மட்டும் இந்த மூன்று சேனல்களைத் தற்காலிகமாக ஒளிபரப்பு செய்ய இயலவில்லை என்று விளக்கம் அளிக்கப்பட்டுள்ளது. இதற்காக ஒப்பந்தம் செய்யப்பட்ட ‘மந்த்ரா இண்டஸ்ட்ரீஸ் லிமிடெட்’ நிறுவனம் மூலம் பழுதுபார்க்கும் பணிகள் முழுவீச்சில் நடைபெற்று வருகின்றன. இந்தத் தொழில்நுட்பப் பிரச்சனை குறித்துச் சம்பந்தப்பட்ட தொலைக்காட்சி நிறுவனங்களுக்கும் முன்கூட்டியே தகவல் தெரிவிக்கப்பட்டுள்ளதால், சேனல்கள் நீக்கப்பட்டதாகப் பரவும் செய்திகளைப் பொதுமக்கள் நம்ப வேண்டாம் எனக் கேட்டுக்கொள்ளப்பட்டுள்ளது.