கடந்த மூன்று வாரங்களாக டெங்கு பாதிப்பு தொடர்ந்து அதிகரித்து வருவதால் சென்னை, திருவள்ளூர் மற்றும் கோவை ஆகிய மூன்று மாவட்டங்களுக்கு ரெட் அலர்ட் விடுக்கப்பட்டுள்ளது. வடகிழக்கு பருவமழை தொடங்க உள்ள நிலையில் தமிழக சுகாதாரத்துறை சார்பாக தொற்றுநோய் தடுப்பு நடவடிக்கைகளை மேற்கொள்வதற்கு பொது சுகாதாரத்துறை இயக்குனர் மாவட்ட சுகாதாரத்துறை இணை இயக்குனர்களுக்கு உத்தரவிட்டுள்ளார். அதன்படி கடந்த மூன்று வாரமாக டெங்கு பாதிப்பு எண்ணிக்கை அதிகரித்துள்ளதால் இதுவரை 15000 மேற்பட்டோர் டெங்குவால் பாதிக்கப்பட்டுள்ளதாக தெரிவிக்கப்பட்டுள்ளது.
இதனை தொடர்ந்து சென்னை, திருவள்ளூர் மற்றும் கோவை ஆகிய மூன்று மாவட்டங்களுக்கு ரெட் அலர்ட் விடுக்கப்பட்டுள்ளதால் அந்தந்த மாவட்ட சுகாதாரத் துறை இணை இயக்குனர்கள் கொசு உற்பத்தியாகும் இடங்களில் நகராட்சி நிர்வாகத்துறையுடன் இணைந்து ஆய்வு செய்து நடவடிக்கை மேற்கொள்ள வேண்டும் எனவும் மாவட்டத்தில் டெங்கு பாதிப்பு ஏற்பட்டால் உடனடியாக சிகிச்சை வழங்குவதற்கான நடவடிக்கை எடுக்க வேண்டும் என்றும் உத்தரவிடப்பட்டுள்ளது. அதுமட்டுமல்லாமல் நீர்நிலைகள், குட்டைகள், ஓடைகள் உள்ளிட்ட இடங்களுக்கு பொதுமக்கள் செல்ல வேண்டாம் என்றும் வீட்டில் அருகே நீர் தேங்காதவாறு பொதுமக்கள் அனைத்து முன்னெச்சரிக்கை நடவடிக்கைகளுடன் இருக்க வேண்டும் என்றும் அரசு அறிவுறுத்தியுள்ளது.