ஒரு ரூபாய் கூட லஞ்சம் இல்லை… முதல்வர் விஜய்யின் அதிரடி ஆட்டம்… திமுகவை அதிரவைத்த ஸ்ரீதர் வேம்பு… தமிழக அரசியலில் திடீர் திருப்பம்…!

தமிழ்நாட்டில் அரசு நிர்வாகத்தின் மிக உயர்ந்த மட்டங்களில் நிலவும் ஊழல் விவகாரம் குறித்து ஜோஹோ (Zoho) நிறுவனத்தின் நிறுவனர் ஸ்ரீதர் வேம்பு அவர்கள் தனது ‘எக்ஸ்’ சமூக வலைதளப் பக்கத்தில் வெளியிட்டுள்ள பதிவு, தற்போது அரசியல் மற்றும் சமூக வட்டாரங்களில் பெரும் விவாதத்தைக் கிளப்பியுள்ளது. லாப நோக்கற்ற அடிப்படையில் ஏழைக் குழந்தைகளுக்கு இலவசக் கல்வி வழங்கி வரும் தங்களது ‘கலைவாணி கல்வி மையம்’ என்ற கிராமப்புறப் பள்ளிக்கு அனுமதி பெறுவதில், முந்தைய திமுக ஆட்சிக்காலத்தில் எதிர்கொண்ட கடுமையான இழுபறிகளையும் லஞ்சக் கோரிக்கைகளையும் அவர் வெளிப்படையாகக் குற்றஞ்சாட்டியுள்ளார். முற்றிலும் இலவசமாகச் செயல்படும் ஒரு பள்ளிக்குக்கூட கணிசமான தொகை லஞ்சமாகக் கேட்கப்பட்டதாகவும், அதுவே அனுமதி பெறுவதற்கான ஒரே வழி என்று தங்களுக்குக் கூறப்பட்டதாகவும் அவர் வேதனை தெரிவித்துள்ளார்.

முந்தைய திமுக அரசின் செயல்பாடுகளுடன் தற்போதைய தவெக (தமிழக வெற்றிக் கழகம்) அரசின் நிர்வாகத்தை ஒப்பிட்டுப் பேசியுள்ள ஸ்ரீதர் வேம்பு, முதல்வர் விஜய் தலைமையிலான புதிய அரசு பதவியேற்ற பிறகு நிலைமை முற்றிலும் மாறியுள்ளதாகக் குறிப்பிட்டுள்ளார். தவெக ஆட்சிக்கு வந்த பின்னர், எவ்வித தாமதமும் லஞ்சமும் இன்றி தங்களது பள்ளிக்குரிய அனுமதிகள் மிக விரைவாகவும், தானாகவும் கிடைத்துள்ளதாக அவர் மகிழ்ச்சியுடன் தெரிவித்துள்ளார். நம் மாநிலத்தில் ஏற்பட்டுள்ள இந்த நேர்மறையான மாற்றமும் புத்துணர்ச்சியும் பாராட்டுக்குரியது என்று குறிப்பிட்ட அவர், இதற்காக முதல்வர் விஜய் அவர்களுக்குத் தனது மனமார்ந்த நன்றியையும் பதிவு செய்துள்ளார்.

திமுக ஆட்சிக்காலத்தில் ஊழல் என்பது உலகறிந்த ரகசியமாக, “இமாலய உயரத்தை” எட்டியிருந்ததாகச் சாடியுள்ள வேம்பு, முந்தைய நிதியமைச்சர் ஒருவர் தனது துறை மாற்றப்படுவதற்கு முன்பு ஊழல் குறித்துப் புகாரளித்ததைச் சுட்டிக்காட்டியுள்ளார். தனது இந்த விமர்சனம் அரசியல் கொள்கை சார்ந்தது அல்ல என்பதைத் தெளிவுபடுத்திய அவர், திமுகவின் கூட்டணிக் கட்சியினரே கூட அதன் ஊழல் பின்னணியை அறிவர் என்றும், கேரளாவின் முன்னாள் நிதியமைச்சர் பாலகோபால் போன்றோரின் நேர்மையான பொதுச்சேவையைத் தான் எப்போதும் மதிப்பவன் என்றும் கூறியுள்ளார். மேலும், தனது நியாயமான குற்றச்சாட்டுகளுக்குச் சுயபரிசோதனை செய்துகொள்வதற்குப் பதிலாக, திமுகவினர் தன்னை ‘தவெக கைக்கூலி’, ‘சங்கி’ என முத்திரை குத்தித் தாக்குவதிலேயே நேரத்தைச் செலவிடுவதாகவும் அவர் சாடியுள்ளார்.

ஸ்ரீதர் வேம்புவின் இந்தப் பாராட்டு, தமிழகப் பள்ளிக்கல்வித்துறை அமைச்சர் ராஜ்மோகன் சமீபத்தில் கொண்டு வந்த அதிரடி சீர்திருத்தங்களின் வெற்றியைப் பிரதிபலிப்பதாக அமைந்துள்ளது. தனியார் பள்ளிகளுக்கான அங்கீகாரம், புதுப்பித்தல் மற்றும் (தடையில்லாச் சான்றிதழ்) போன்ற விண்ணப்பங்கள் அனைத்தும் இனி ஆன்லைன் மூலமாக மட்டுமே நடைபெறும் என்றும், கல்வித்துறை அதிகாரிகளின் நேரடித் தலையீடின்றி தகுதி ஒன்றே ஒரே அளவுகோலாக இருக்கும் என்றும் அமைச்சர் உத்தரவிட்டிருந்தார். தவெக அரசின் இந்த வெளிப்படையான, ஊழலற்ற ஆன்லைன் நடைமுறை உண்மையில் களத்தில் பயனுள்ளதாக இருப்பதை ஜோஹோ தலைவரின் இந்த தற்போதைய பதிவு உறுதிப்படுத்துகிறது.