பெங்களூருவின் ஜிகானி பகுதியில் உள்ள ஒரு தனியார் நிறுவனத்தில் பாதுகாப்புப் பணியாளராக வேலை செய்து வந்த மேற்கு வங்கத்தைச் சேர்ந்த அசாஃபூல் மல்லிக் என்ற இளைஞரை, தீவிரவாத அமைப்புகளுடன் தொடர்பில் இருந்ததாகக் கூறி காவல்துறையினர் அதிரடியாகக் கைது செய்துள்ளனர். கடந்த 2025-ஆம் ஆண்டு இறுதியில் இருந்து பெங்களூருவில் தங்கியிருந்த இவரது நடவடிக்கைகளில் சந்தேகம் அடைந்த போலீசார், வழக்கமான கண்காணிப்பின் மூலம் இவரைக் கண்டறிந்து இந்த நடவடிக்கையை மேற்கொண்டுள்ளனர்.
இவரிடம் மேற்கொள்ளப்பட்ட விசாரணையில், சமூக ஊடகமான ஃபேஸ்புக் வழியாக ஆப்கானிஸ்தானை இருப்பிடமாகக் கொண்ட இம்ரான் ஹைதர் என்பவருடன் இவர் நெருங்கிய தொடர்பில் இருந்தது கண்டுபிடிக்கப்பட்டுள்ளது. இம்ரான் தடைசெய்யப்பட்ட ‘தெஹ்ரீக்-இ-தலிபான் பாகிஸ்தான்’ அமைப்பைச் சேர்ந்தவர் என போலீசார் கருதுகின்றனர். பாலஸ்தீன விவகாரத்தில் பாகிஸ்தானின் நிலைப்பாடு மற்றும் இஸ்லாமியர்களுக்கும் அவர்களது வழிபாட்டுத் தலங்களுக்கும் எதிராக பாகிஸ்தான் ராணுவம் செயல்படும் விதம் ஆகியவற்றால் கடும் அதிருப்தியடைந்த மல்லிக், பழிவாங்கும் நோக்கத்தோடு இந்தத் தொடர்புகளை ஏற்படுத்தியதாகத் தெரியவந்துள்ளது.
தனது பழிவாங்கும் எண்ணத்தை நிறைவேற்றுவதற்காக, இணையவழி நண்பரின் உதவியோடு ஆப்கானிஸ்தான் சென்று அந்த தீவிரவாத அமைப்பில் இணைய மல்லிக் முடிவு செய்துள்ளார். இதற்காக பாஸ்போர்ட் பெற்று விசாவுக்கும் விண்ணப்பித்திருந்த நிலையில், தன்னிடம் போதிய பொருளாதார வசதி இல்லாத காரணத்தாலும், குடும்பச் சூழ்நிலை காரணமாகவும் அந்தப் பயணத்தை அவர் பாதியிலேயே கைவிட்டுள்ளார். தற்போது, அவர் மேற்கொண்ட இணையவழி உரையாடல்கள், அவரது செல்போன் தரவுகள் மற்றும் வேறு ஏதேனும் வெளிநாட்டுத் தொடர்புகள் அவருக்கு உள்ளதா என்பது குறித்து காவல் துறையினர் தொடர்ந்து ஆழமான விசாரணையை முன்னெடுத்து வருகின்றனர்.