“நீ இல்லாம நான் எப்படி இருப்பேன் மச்சான்?”… நண்பன் போட்டிருந்த அதே சட்டை.. அதே இடத்தில் தற்கொலை….நெஞ்சை உறையவைக்கும் சம்பவம்….!

கன்னியாகுமரி மாவட்டம் ஆரல்வாய்மொழி அருகே ஐபோன் மோகத்தால் ஏற்பட்ட கடன் சுமை மற்றும் நண்பனின் பிரிவைத் தாங்க முடியாமல் இரண்டு வாலிபர்கள் அடுத்தடுத்து தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது. செண்பகராமன்புதூர் பகுதியைச் சேர்ந்த ஐடிஐ மாணவர் வசந்தகுமார் (20) மற்றும் ஆரல்வாய்மொழி வடக்கூரைச் சேர்ந்த முத்து கிஷோர் (19) ஆகிய இருவரும் நெருங்கிய நண்பர்களாக இருந்து வந்தனர். இவர்களின் உயிரிழப்பு அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.

இந்தச் சோகத்தின் பின்னணியாகக் கூறப்படுவது யாதெனில், முத்து கிஷோர் சில மாதங்களுக்கு முன்பு தவணை முறையில் (EMI) விலையுயர்ந்த ஐபோன் ஒன்றை வாங்கியுள்ளார். நான்கு மாதங்கள் முறையாகத் தவணை செலுத்திய நிலையில், பின்னர் பண நெருக்கடியால் அவரால் தவணைத் தொகையைச் செலுத்த முடியவில்லை. இதனால் நிதி நிறுவன ஊழியர்கள் கொடுத்த நெருக்கடியும், பெற்றோரின் கண்டிப்பும் முத்து கிஷோரை கடும் மன உளைச்சலுக்கு ஆளாக்கியுள்ளது. இதன் விளைவாக, கடந்த பிப்ரவரி 3-ம் தேதி அவர் தனது வீட்டில் தூக்கிட்டுத் தற்கொலை செய்து கொண்டார்.

தன் உயிர் நண்பன் முத்து கிஷோரின் மரணம் வசந்தகுமாரை வெகுவாகப் பாதித்துள்ளது. நண்பனின் பிரிவால் வாடிய அவர், சரியாகக் கல்லூரிக்குச் செல்லாமலும் யாரிடமும் பேசாமலும் மன அழுத்தத்தில் இருந்துள்ளார். முத்து கிஷோரின் உடைகள் மற்றும் நினைவுகளுடனேயே காலத்தைக் கழித்து வந்த வசந்தகுமார், நண்பன் இல்லாத உலகில் வாழப் பிடிக்காமல் பித்து பிடித்த நிலையில் காணப்பட்டதாகக் கூறப்படுகிறது.

இந்நிலையில், நேற்று வீட்டில் யாரும் இல்லாத நேரத்தில் வசந்தகுமார் தனது நண்பனின் சட்டையை அணிந்து கொண்டு தூக்கிட்டுத் தற்கொலை செய்து கொண்டார். ஒரே கல்லூரியில் பயின்று வந்த இரு நண்பர்கள் ஐபோன் மோகத்தால் தொடங்கிய பிரச்சினையில் சிக்கி அடுத்தடுத்து உயிரை மாய்த்துக் கொண்ட சம்பவம், இளைய தலைமுறையினரிடையே நிலவும் தேவையற்ற ஆடம்பர மோகம் மற்றும் அதன் விபரீத விளைவுகளைச் சுட்டிக்காட்டுவதாக அமைந்துள்ளது.