விடுமுறை நாட்களில் அதிக நேரம் தூங்குபவரா நீங்கள்…? மூளைக்குக் காத்திருக்கும் பெரிய ஆபத்து…!!

வார முழுவதும் உழைத்த சோர்வைத் தீர்க்க வார இறுதி நாட்களில் நீண்ட நேரம் தூங்குவது பலரது வழக்கம். ஆனால், இது உடலின் இயல்பான உயிரியல் கடிகாரத்தைச் (Circadian Rhythm) சிதைத்து, மூளையைச் சோர்வடையச் செய்யும் என்று மருத்துவர்கள் எச்சரிக்கின்றனர். இப்படித் தூக்க நேரத்தை அடிக்கடி மாற்றுவது, ஒரு நாட்டின் நேரத்திலிருந்து மற்றொரு நாட்டின் நேரத்திற்குப் பயணம் செய்யும்போது ஏற்படும் ‘ஜெட் லேக்’ போன்ற பாதிப்பை மூளைக்குள் உண்டாக்குகிறது.

இதனால், எப்போது விழித்திருக்க வேண்டும், எப்போது ஓய்வெடுக்க வேண்டும் என்பதில் மூளைக்குக் குழப்பம் ஏற்பட்டு, நினைவாற்றல் குறைதல் மற்றும் கவனச்சிதறல் போன்ற பிரச்சனைகள் உருவாகின்றன. வார இறுதி நாட்களில் அதிக நேரம் தூங்குவது இழந்த தூக்கத்தை ஈடுகட்டாது. மாறாக, இது திங்கட்கிழமை காலையில் அதிகச் சோர்வையும் மந்தநிலையையும் மட்டுமே தரும்.

ஞாயிறு இரவு தூக்கம் வராமல் தவிப்பதற்கும், திங்கள் காலை எழ முடியாமல் போவதற்கும் இந்த ஒழுங்கற்ற தூக்க முறையே காரணமாகிறது. மூளை சுறுசுறுப்பாக இயங்கவும், மன அழுத்தம் மற்றும் எரிச்சல் வராமல் தடுக்கவும் விடுமுறை நாட்கள் உட்பட வாரம் முழுவதும் ஒரே நேரத்தில் உறங்கி எழும் பழக்கத்தை ஏற்படுத்திக் கொள்ள வேண்டும். பகலில் சோர்வாக இருந்தால் அரை மணி நேரம் மட்டும் குட்டித் தூக்கம் போடுவது சிறந்தது.