விவசாயிகளே அலர்ட்..! PM கிசான் 23-வது தவணை எப்போது..? அரசின் ரூ.2000 பெற உடனே செய்ய வேண்டிய இ-கேஒய்சி பணிகள்..!!

மத்திய அரசின் ‘பிஎம் கிசான்’ (PM-KISAN) திட்டத்தின் கீழ், தகுதியுள்ள விவசாயிகளுக்கு ஆண்டுதோறும் 6,000 ரூபாய் நிதியுதவி தலா 2,000 ரூபாய் வீதம் மூன்று தவணைகளாக வழங்கப்பட்டு வருகிறது. கடந்த மார்ச் 13, 2026 அன்று அஸ்ஸாமில் இருந்து பிரதமர் நரேந்திர மோடி 22-வது தவணைத் தொகையை விடுவித்த நிலையில், தற்போது நாடு முழுவதும் உள்ள லட்சக்கணக்கான விவசாயிகள் 23-வது தவணையை எதிர்பார்த்துக் காத்திருக்கின்றனர். இந்த 23-வது தவணைத் தொகையானது வரும் ஜூன் மாத இறுதி அல்லது ஜூலை மாதத் தொடக்கத்தில் விவசாயிகளின் வங்கிக் கணக்குகளில் வரவு வைக்கப்படலாம் என்று எதிர்பார்க்கப்படுகிறது.

இந்த 23-வது தவணைத் தொகையை எந்தவித தடங்கலும் இன்றிப் பெறுவதற்கு விவசாயிகள் தங்களின் இ-கேஒய்சி (e-KYC) சரிபார்ப்பை உடனடியாக முடிப்பது கட்டாயமாக்கப்பட்டுள்ளது. இதனை முடிக்காத விவசாயிகளுக்கு அடுத்த தவணைத் தொகை கிடைக்காது என்று அரசு தெளிவுபடுத்தியுள்ளது. விவசாயிகள் பிஎம் கிசான் இணையதளத்திற்குச் சென்று ஆதார் எண் மற்றும் மொபைல் ஓடிபி மூலமாகவோ, அல்லது அருகில் உள்ள பொதுச் சேவை மையங்களுக்கு (CSC) சென்று கைரேகை பதிவு மூலமாகவோ இ-கேஒய்சி-யை முடிக்கலாம். மேலும், பிஎம் கிசான் செயலியைப் பதிவிறக்கம் செய்து முக அங்கீகார (Face Authentication) தொழில்நுட்பம் மூலமாகவும் வீட்டிலிருந்தபடியே எளிதாகச் சரிபார்ப்பை மேற்கொள்ளலாம்.

விவசாயிகள் தங்களுடைய தவணைத் தொகை எந்த நிலையில் உள்ளது என்பதை அறிந்துகொள்ள, பிஎம் கிசான் அதிகாரப்பூர்வ இணையதளத்தில் உள்ள ‘Beneficiary Status’ அல்லது ‘Know Your Status’ என்ற பகுதியைத் தேர்வு செய்ய வேண்டும். அங்கு தங்களுடைய பதிவு எண் அல்லது ஆதார் எண்ணை உள்ளிட்டு, ‘Get Data’ என்பதை அழுத்தினால் தவணைத் தொகை தொடர்பான முழு விவரங்களையும் திரையில் காணலாம். வேளாண் தேவைகளுக்கும், குடும்பச் செலவுகளுக்கும் பெரிதும் உதவும் இந்த நிதியுதவியைப் பெற, விவசாயிகள் அனைவரும் தங்களின் ஆவணங்களையும் இ-கேஒய்சி சரிபார்ப்பையும் உரிய நேரத்தில் முடித்துக்கொள்ளுமாறு அறிவுறுத்தப்படுகிறார்கள்.